Այս բաժինը հնարավորություն է տալիս գրավոր արտահայտել Ձեր կարծիքը, տեսակետը և դիրքորոշումը: Ի տարբերություն դիմումների, նամակները պաշտոնական ընթացակարգով քննության չեն առնվում:

Ձեր պաշտոնական դիմումը ՀՀ կառավարությանն այլևս թափանցիկ ընթացակարգ ունի: Մեր կայքի շնորհիվ Դուք կարող եք տեղեկանալ, թե կառավարության որ մարմնին կամ պաշտոնյային է Ձեր առձեռն հանձնած կամ փոստով ուղարկած դիմումը վերահասցեագրվել:

Որոնում

azdararir

iGov.am iPhone/iPad application Այսուհետ կարող եք օգտվել մոբայլ սարքերի համար iGov.am հավելվածից, որը հնարավոր է ներբեռնել AppStore-ում և Google Play-ում:

Թեժ գիծ

Տեղեկատվության ազատության ապահովման պատասխանատու
Ներքին և արտաքին ազդարարման պատասխանատու

1-17(զանգն անվճար է)

+374 (10) 527-000(արտերկրից զանգերի համար)

Պաշտոնական էլ. փոստ

(միայն www.e-citizen.am համակարգով ծանուցումների համար)

Էլ. կառավարում

Հարցազրույցներ, ճեպազրույցներ

Երկուշաբթի, 7 Նոյեմբերի 2016

ՀՀ վարչապետ Կարեն Կարապետյանի հարցազրույցը Տիգրանակերտում

 Արտակ Հովհաննիսյան, «Շանթ» հ/ը - Դիրքերից եք վերադարձել, ի՞նչ տպավորությամբ:
ՀՀ վարչապետ Կարեն Կարապետյան- Տպավորությունը շատ ոգևորիչ է, պարտավորեցնող, տեսել ենք մեր զինվորներին, տեսել ենք իրենց կամքը, դուխը, համեստությունը: Իրականում շատ ոգևորիչ և պարտավորեցնող է:
Նելլի Լազարյան, «Tert.am» լ/կ - Պարոն վարչապետ, իսկ դուք նկատեցի՞ք, որ հիմնականում անապահով ընտանիքների երեխաներն են առաջնագծում: Դուք դրան ի՞նչ բացատրություն կտաք:
ՀՀ վարչապետ Կարեն Կարապետյան- Ճիշտն ասած, այսօր ես դա չեմ նկատել, բայց լսել եմ, որ նման վիճակագրություն կա: Կարծում եմ, որ այդ վիճակագրությունն անարդարացի է, եթե դա այդպես է: Մենք գրել ենք մեր ծրագրում, մենք ասել ենք, թե ինչ նպատակներ ունենք, ասել ենք, որ մեր հասարակության մեջ ամենամեծ դեֆիցիտն անարդարության դեֆիցիտն է: Բազմիցս ֆիքսել ենք, գուցե կրկնվում եմ, որ մեր ազգի լավագույն հատկություններից մեկը՝ գրգռված ըմբոստությունն է անարդարությանը: Եթե դա իրոք այդպես է, ապա մեր Պաշտպանության բանակի հրամանատարները, մենք՝ բոլորս, դրա մասին մտածելու և այն ուղղելու անհրաժեշտություն ունենք:
Նելլի Բաբայան, «Առավոտ» օրաթերթ– Պարոն Կարապետյան, երկու հարց ունեմ Ձեզ: Լրագրողների հարցին ի պատասխան Էդուարդ Շարմազանովն ասել է՝ չզարմանաք, եթե Կարեն Կարապետյանը դիմում գրի Հայաստանի Հանրապետական կուսակցությանն անդամագրվելու: Ի վերջո, նոյեմբերին սպասվում է մեծ համագումար, Դուք պատրաստվո՞ւմ եք անդամակցել Հայաստանի Հանրապետական կուսակցությանը, եթե այո, խնդրում ենք նշեք նաև՝ մոտիվացիան ո՞րն է:
ՀՀ վարչապետ Կարեն Կարապետյան- Կարճ պատասխանեմ՝ ես կհայտարարեմ, անպայման կհայտարարեմ և եթե նման որոշում կայացնեմ, ապա նաև մոտիվացիան կհայտարարեմ:
Նելլի Բաբայան, «Առավոտ» օրաթերթ– Հաջորդ հարցս, պարոն վարչապետ, գազի սակագնի վերանայման մասին է: Որոշվեց, որ այն իջեցվելու է: Ես խնդրում ենք նշեք, որ գործոնների հաշվին է գազի սակագինը իջեցվելու: Որոշ տնտեսագետներ, փորձագետներ ասում են, որ սա կարճաժամկետ է, մի քանի ամսվա համար է: Այդպե՞ս է, թե՞ ոչ, խնդրում եմ ասեք: Հաշվի առնենք, որ «Գազպրոմ»-ն անցած տարի աշխատում էր ավելի բարձր սակագնով, կարծես, վնասներով է աշխատել՝ 10 միլիարդ, գուցե թվում սխալվեմ մի փոքր, այդ դեպքում եթե այժմ ավելի է նվազեցվելու, ապա ի՞նչպես է աշխատելու: Արդյո՞ք նվազեցման հաշվին «Երևան ՋԷԿ»-ը «Գազպրոմ»-ին հանձնելու որևէ պայմանավորվածություն կլինի:
ՀՀ վարչապետ Կարեն Կարապետյան- Ես նշել եմ աղբյուրները չորսն են, և շատ տրամաբանական: Աղբյուր առաջին՝ Վրաստանում տրանզիտի գնի հնարավոր նվազեցումը, որովհետև տրանզիտի պայմանագիրն ավարտվում է հունվարի 1-ից: Աղբյուր երկրորդ՝ «Գազպրոմ Արմենիա»-ն, ունենալով վարկային բեռ, այս տարիների ընթացքում այն մաշեցնում է և իր բեռը նվազում է: Աղբյուր երրորդ՝ փորձ է արվում գազի գնի նվազեցմամբ շուկան մեծացնել, որի պարագայում սպասվելիք մարժաները, մուտքերը կավելանան, հույս կա: Աղբյուր չորրորդ՝ շուկայի կայունացման և մեծացման համար «Գազպրոմ Արմենիա»-ի միակ բաժնետերն ասել է, որ ձեր ֆինանսական ռիսկերին տեր կկանգնեմ: Չե՞ք հավատում, ինչո՞ւ:
Նելլի Բաբայան «Առավոտ» օրաթերթ– Հավատում եմ:
Բաբկեն Թունյան, «168 ժամ» թերթ - Մոտիվացիան պարզ չէ:
ՀՀ վարչապետ Կարեն Կարապետյան- Ասեմ մոտիվացիան ինչումն է: Շուկայի նվազեցման, տնտեսական աշխուժացման խնդիր կա: Մենք «Գազպրոմ Արմենիա»-ի հետ բանակցել ենք որպես բիզնեսմենը բիզնեսմենի հետ: Ես՝ որպես վարչապետ, շահագրգռված եմ բիզնեսին մաքսիմալ առավելություններ տալ, բայց որևէ ընկերության հաշվին ես դա անել չեմ կարող, որովհետև դա նույնն է, թե մեկին խեղդեմ, մյուսին՝ անհասկանալի է կլավացնեմ, թե չէ: Ասել եմ՝ եկեք նստենք, թուղթ ու գրիչով մտածենք, ձեր շուկան կրճատվում է, տնտեսական ակտիվությունը պակասում է: Իսկ շուկայի կրճատման դեպքում ամեն անգամ դուք գալու եք նոր մարժա ուզեք, որովհետև քիչ ծավալի վրա ձեր մարժան պետք է մեծանա: Շատ տրամաբանական, բիզնես տրամաբանական առաջարկ ենք արել: Ասում են, թե սուբսիդավորելու է բյուջեն: Չի սուբսիդավորելու: Սոցիալապես անապահովին եթե անցած տարի, այս տարի սուբսիդավորել ենք, ապա այժմ չենք սուբսիդավորելու: Շատ խիստ կապված է, թե շուկան ինչպես կարձագանքի, ակնհայտ բան եմ ասում: Եթե փորձը հաջողվի, եթե շուկան մեծանա, եթե «Գազպրոմ Արմենիա»-ն և իր բաժնետերը տեսնեն, որ շուկան արձագանքում և մեծանում է, այդ փորձը կշարունակեն: Ինձ՝ որպես վարչապետ, ձե՞ռք է տալիս, որպեսզի այդ փորձը երկար լինի՝ այո, ցանկանո՞ւմ եմ, որ «Գազպրոմ Արմենիա»-ի համար այդ փորձը ստացվի, հաջողակ լինի, որ իրենք այդ փորձի և իրենց ցանկության համար չփոշմանեն՝ այո: Շատ պարզ է, հասկանում եք, որևէ գաղտնիք չկա: Իրականում որևէ գաղտնիք չկա, կամայական բիզնեսի մեջ այդպես է: Ես այս բաժակը վաճառում եմ, կարող եմ 10 բաժակ վաճառել մեկ ռուբլով, ասում եմ՝ եկեք փորձենք 0,97 դնենք, կարող է 12 վաճառենք կամ 14, մարժայի մեջ 0,3-ը պակաս կլինի, բայց ծավալի մեջ շատ կանենք: Բիզնես տրամաբանություն է:
Բաբկեն Թունյան, «168 ժամ» թերթ– Այսինքն, կառավարությունը մասնավոր բիզնեսին օպտիմալացման արդյունավետության ճանապարհ է հուշել, խորհրդատվություն է մատուցել, այդպես է ստացվում:
ՀՀ վարչապետ Կարեն Կարապետյան- Գիտեք ինչ, ոչ թե հուշել է… Մենք բանակցել ենք, մենք քննարկել ենք և մենք պատրաստ ենք յուրաքանչյուր բիզնեսմենի հետ խոսել: Մենք ի՞նչ ենք ասում: Պետության հիմնական ֆունկցիան ինչո՞ւմ է կայանում: Ըստ ինձ՝ բիզնեսին չխանգարելը, բիզնեսի համար հավասար պայմաններ ստեղծելը, որովհետև բիզնեսը միշտ գտնում է այն ոլորտը, որը շահույթ է բերում, արդյունավետ է կառավարում, համենայն դեպս, մեջները կան էֆեկտիվ կառավարիչներ և այլն: Բայց, տեսնելով այս տնտեսական ակտիվությունը կամ պասիվությունը, մենք որոշել ենք մեզ վրա որոշակի գործառույթներ վերցնել, խթանող գործառույթներ, որպեսզի բիզնեսն աշխուժացնենք: Եվ ուզում եմ ձեր ներկայությամբ ասել, որ այսօր Լեռնային Ղարաբաղի Հանրապետության կառավարությունը ներկայացրել է, թե ինչպես են աշխատել իրենց հիմնադրամները գյուղատնտեսության և այլ ոլորտներում: Ես, իրականում, համարում եմ ֆանտաստիկ ճիշտ, համարձակ, բիզնես տրամաբանությամբ քայլ են արել, և այն աճը՝ տոկոսներով, որը տեսնում ենք Լեռնային Ղարաբաղում՝ հաշվի առնելով անվտանգության խնդիրները, բիզնեսի ռիսկայնությունը: Ես համարում եմ շատ համարձակ բարեփոխումների քայլ, որը արդյունք է տվել:
Նելլի Բաբայան, «Առավոտ» օրաթերթ– Պարոն վարչապետ, մի ճշտող հարց, Դուք ասացիք սահմանին գազի սակագնի հնարավոր նվազեցում, այսինքն՝ պայմանավորվածություն կա՞:
ՀՀ վարչապետ Կարեն Կարապետյան- Սահմանին չեմ ասել, ասել եմ՝ տրանզիտի գնի նվազեցման: Ամսի մեկին է ավարտվում պայմանագիրը, բանակցող կողմը «Գազպրոմ»-ն է, որովհետև մատակարարը «Գազպրոմ»-ն է: Իրենք իրենց վրաց գործընկերների հետ բանակցելու են: Եթե դիմեն հայկական կողմին աջակցության համար, ապա մենք էլ կմասնակցենք:
Արտակ Հովհաննիսյան, «Շանթ» հ/ը- Պարոն վարչապետ, առանց տնտեսական մանրամասների մեջ խորանալու, փորձեք այդ մոտիվացիան հեռուստադիտողի համար շատ պարզ, ավելի հասկանալի լեզվով բացատրել՝ ինչո՞ւ է այդ էժանացումը հենց այժմ տեղի ունենում: Եվ շատ հասարակ տրամաբանություն կա, եթե դա արվում է, ուրեմն հնարավոր էր, ինչո՞ւ օրինակ երկու կամ մեկ ամիս առաջ դա չէր արվում:
ՀՀ վարչապետ Կարեն Կարապետյան- Կամայական նոր բան, միշտ կարող եք հարցնել, ինչո՞ւ 2-3 ամիս առաջ չեք արել: Դրանով էլ դա նոր է, որ 2-3 ամիս առաջ չեն արել, հիմա արել են: Հիմա ի՞նչ մոտիվացիա են ասում՝ նախընտրական քայլ է, պոպուլիստական քայլ է, այս է, այն է: Նախ նախընտրական չէ, ես այսօր ստանձնել եմ վարչապետի պարտականությունները և իմ առաջին նպատակային ֆունկցիան տնտեսության մեջ ակտիվություն մտցնելն է: Եթե որևէ մեկն այն ցանկանում է մեկնաբանել որպես նախընտրական, թող մեկնաբանի, եթե նույնիսկ նախընտրական է, լա՞վ է, թե՞ վատ: Հիմա եկեք քննարկենք, սա լա՞վ է, թե՞ վատ: Եթե լավ է՝ լավ է:
Արտակ Հովհաննիսյան, «Շանթ» հ/ը - Առհասարակ, ինչ քննարկվում է, ժողովրդի մոտ տրամադրություն է ձևավորվում: Դա իրականում կապ չունի ընտրությունների հետ, հենց այդ քարոզչության ինչ-որ մի մաս չէ…:
ՀՀ վարչապետ Կարեն Կարապետյան- Պարոն Հովհաննիսյան ջան, ընտրություն չկա, ես վարչապետ եմ, ձևավորել ենք կառավարություն, մենք նստում, մտածում ենք՝ ինչպես անենք, որպեսզի տնտեսությունն ակտիվացնենք: Տեսնո՞ւմ եք, որ տնտեսությունը պասիվ է, ընդունո՞ւմ եք դա:
Արտակ Հովհաննիսյան, «Շանթ» հ/ը - Իհարկե:
ՀՀ վարչապետ Կարեն Կարապետյան- Ընդունո՞ւմ եք, որ մենք քայլ պետք է անենք, որ տնտեսությունն աշխուժանա, իր համար պայմաններ, արդար միջավայր պե՞տք է ստեղծենք: Հիմա եթե ընտրություն չլիներ, այս հարցն այդքան հետաքրքրություն չէ՞ր առաջացնի: Պատկերացրեք ընտրություն չկա, մենք այդ շանսն ունենք, անե՞նք, թե՞ չանենք: Ի՞նչ եմ ուզում: Ես իրականում շատ եմ ցանկանում, չափազանց շահագրգռված եմ, որ մեր լրագրողական միջավայրն էլ, ինչպես մենք ենք հայտարարում՝ մենք ուզում ենք փոխվել, իրենք էլ այդ առումով հայտարարություն անեն կամ մասնագիտացվեն, որպեսզի մենք տնտեսական հարցերի շուրջ խոսենք պրոֆեսիոնալ մակարդակով, ձեր քննադատությունը լինի պրոֆեսիոնալ և ձեր քննադատության մեջ կիրառական ասպեկտ լինի՝ խորհուրդ տաք զուտ մասնագիտորեն: Մենք էլ դրան անդրադառնանք, որովհետև կամայական մեր տնտեսական քայլի մեջ, որը մենք անելու ենք տնտեսության աշխուժացման համար, դուք առաջին հերթին տեսնելու եք քաղաքական, նախընտրական բան: Եթե ընտրություն չլիներ, ոնց է ձեզ թվում՝ ես, մեր թիմը, եթե գտնում ենք՝ այս բանը պետք է անել կամ չանել, անեի՞նք, թե՞ չանեինք: Ասեմ ձեզ՝ վեց ամիս հետո ընտրությունները մեր կառավարությանը չափազանց խանգարում են, և ես բացատրել եմ՝ ինչով են խանգարում: Նախընտրական ժամանակահատվածը ոչ մի երկրում ակտիվ չի լինում, կամայական իրավիճակ սպասողական է լինում. բիզնեսն է սպասում, հասարակությունն է սպասում: Ասել եմ, որ չափազանց կարևոր է, որ մենք հասարակության հետ կարողանանք հետադարձ կապ ունենալ, կարողանանք այնպես անել, որ հասարակությունը մեզ հավատա, որովհետև մենք առանց հասարակության, առանց աշխատող մարդու, առանց գործարար մարդու, առանց քաղաքացիական դիրքորոշում ունեցող մարդու երկրում բան չենք կարող փոխել: Ամենախելոք բաները որոշենք, գրենք, հայտարարենք, հրաման տանք. ինքը պետք է անի, բոլորս պետք է անենք: Այդ իսկ պատճառով այս 6 ամիսը ես սպասո՞ւմ եմ, որ կլինի պասիվ՝ այո, ուզո՞ւմ եմ լինի ակտիվ՝ չափազանց շատ եմ ուզում լինի ակտիվ:
Հարց – Դա նշանակում է, որ 6 ամիս հետո դեռ հետագայի, ապագա պլաններ կա՞ն, այսինքն՝ սա վեցամսյա կառավարություն չի՞ լինի:
ՀՀ վարչապետ Կարեն Կարապետյան – Օրինակ, որ ես ասեմ՝ ես եկել եմ 6 ամսով, Դուք ինձ կհարգե՞ք:
Արմինե Ուդումյան, Հանրային հեռուստաընկերություն,– Պարոն Կարապետյան, այս մեկուկես ամսվա ընթացքում Ձեր և Ձեր կաբինետի անդամների կողմից խոսվեց Հայաստանի տնտեսության խնդիրների վերաբերյալ, ասենք՝ կոռուպցիա, մենաշնորհներ, բյուջեի դեֆիցիտ կամ դեֆիցիտի մեծ ծավալ: Դրանցից ամենադժվար հաղթահարելի խնդիրը Ձեզ համար ո՞րն է, և դրանցից որո՞նք են, որ բնորոշ են նաև Արցախի տնտեսությանը:
ՀՀ վարչապետ Կարեն Կարապետյան – Ամենադժվար խնդիրը, որ մեզ հավատան և տակը ենթատեքստ ման չգան: Ես, ճիշտն ասած, շուկայի բաժանվածությունը չգիտեմ, բայց Արցախում, կարծում եմ, կոռուպցիոն ռիսկերը մինիմումի են բերված, և դա կառավարիչների մեծ հաջողությունն է: Մոնոպոլիզացիա շուկայում կա, թե չէ՝ չգիտեմ, բայց շուկայի փոքրությունը կարող է բերել, որ որոշակի ոլորտներում գերիշխող լինեն, բայց ավելի քան համոզված եմ, որ այդ գերիշխողն էլ, եթե կա այդպիսին, ձևավորվում է մրցունակ դաշտում: Այդ իսկ պատճառով գերիշխողին մրցունակ դաշտում ես մոնոպոլիա չեմ անվանում, որովհետև մոնոպոլիա բառն ասելուց անպայման ենթադրում ենք վատ բան:
Բելլա Լալայան, Արցախի Հանրային ռադիո– Պարոն Կարապետյան, այսօր, երեկ Դուք խոսեցիք տեղեկատվական և հեռահաղորդակցության տեխնոլոգիաների ոլորտում հեղափոխական ծրագրերի և մենաշնորհի մասին: Արցախում միակ մենաշնորհը «Ղարաբաղ-Տելեկոմ»-ն է, որը խանգարում է տեղեկատվական տեխնոլոգիաների ինչ-որ քայլեր անել: Պայմանագիրը կնքվել է նախկին վարչապետի օրոք, հանցավոր պայմանագիր կարելի է համարել: Արդյոք արցախցիները կարո՞ղ են ակնկալել ինչ-որ կտրուկ քայլեր այս ոլորտում, որովհետև կարելի է ցանկացած պայմանագիր չեղյալ համարել՝ ամենաանելանելի վիճակից ելնելով: Եվ երկրորդ հարցը՝ Դուք խոսել եք նաև ապօրինի հարստացման քրեականացման մասին: Չե՞ք կարծում, որ կան օրենքներ, որոնք պետք է հետադարձ ուժ ունենան, որովհետև Ձեր ասած օրենքը փաստորեն ուժի մեջ է մտնելու ընդունելու օրվանից, բայց մինչև այդ ապօրինի հարստացածները փաստորեն մնալու են անպատիժ:
ՀՀ վարչապետ Կարեն Կարապետյան – Ինչ վերաբերում է բարձր տեխնոլոգիաներին, տեղեկատվական բիզնեսին, այո, մենք ուզում ենք աշխարհ շուռ տանք, կստացվի՝ ժամանակը ցույց կտա: Ինչո՞ւ: Այդ տեխնոլոգիայի արդյունավետությունը շատ է, կտրուկ փոփոխություն անելու շանսը շատ է: Գյուղատնտեսության մեջ մենք շատ երկար, ծանր ճանապարհ պետք է անցնենք, որտեղ հիմնական խնդիրը գյուղատնտեսությամբ զբաղվող մարդուն պետք է ապահովել, որպեսզի ինքն իր ծախսերը հոգա. ՀՆԱ-ի մեջ ինքը մեծ աճ կարո՞ղ է տալ, կտրուկ փոփոխություն կարող է տալ՝ ոչ, նշանակո՞ւմ է, որ մենք այդ ոլորտով պետք է չզբաղվենք՝ ոչ: Ո՞ր ոլորտն է, որը կարող է ֆիշկա լինել, կտրուկ աճ տալ՝ ոլորտներից մեկը դա է: Մեր խոսակցությունն անավարտ մնաց, մենք պայմանավորվել ենք երեքշաբթի նույնպես հանդիպել: Բանաձևը հետևյալն է. բիզնեսն ասում է՝ իրեն ինչ է պետք, որպեսզի ինքը հեղափոխություն անի, ի՞նչ է ակնկալում մեզանից, մենք ասում ենք՝ այդ ակնկալիքների մեջ մեր մուսկուլները, մեր բյուջեն, մեր ինտելեկտուալ կարողությունները թո՞ւյլ են տալիս, թե՞ ոչ, և մենք գնում ենք առաջ: Ընդ որում, մենք շատ համարձակ առաջարկություն ենք արել՝ սկսած նրանից, որ դուք ասում եք՝ ձեզ պետք են կադրեր, կադրերի պրոբլեմ կա, եկեք մտածենք՝ ոնց ենք մենք այդ կադրերի դաստիարակման, կրթական համակարգի մեջ համատեղ կառավարում, ընդ որում, մենք պատրաստ ենք իրենց հետ պայմանավորվել, հենց այդ կառավարումը տալ իրենց:
Ինչ վերաբերում է «Ղարաբաղ-Տելեկոմ»-ի հետ կապված հարցին՝ մոնոպոլ, ոչ մոնոպոլ, կարծում եմ՝ կպատասխանի Լեռնային Ղարաբաղի վարչապետը, բայց Ղարաբաղի շուկան այնքան փոքր է, որ մի հատ էլ «Ղ-Տելեկոմ-2» բերեք, էդ երկուսով ո՞նց են տեղավորվելու, ես չգիտեմ:
Ձեր հարցի երկրորդ մասը՝ օրենքը պետք է հետադարձ ուժ ունենա, իմ կարծիքով՝ ոչ, որովհետև խաղի կանոնները, որ հայտարարում ես, պետք է մաքսիմալ կշռադատես, խաղի կանոններն ուշ-ուշ փոխես, որովհետև մարդիկ այդ խաղի կանոններով որոշակի ծրագրեր են անում, սկսում են աշխատել: Դա նշանակում է արդյոք, որ եթե հետադարձ ձևով մենք գտնենք, որ մարդիկ կան, որոնք պետք է պատասխանատվություն կրեն, այս օրենքի բացակայության ժամանակ իրենք չեն կրի պատասխանատվություն, իհարկե՝ ոչ: Ես Ձեզ ասեմ՝ բազմաթիվ երկրներ կան, որտեղ այս օրենքը գոյություն չունի, և կոռուպցիայի վիճակը և կոռուպցիայի դեմ պայքարը գուցե ավելի հաջողված է, քան մեզ մոտ: Օրենքի լինել-չլինելը դեռ երաշխիք չէ, որ այդ ամեն ինչը լավ է: Բայց օրենքը տալիս է հնարավորություններ:
Արտակ Հովհաննիսյան, «Շանթ» հ/ը - Պարոն վարչապետ, մեկ ամսից՝ դեկտեմբերին, կլրանա երկրաշարժի 28 տարին: Մենք այնտեղ ունենք խնդիր, որը ծավալներով փոքրանում է, բայց չի վերջանում, և այդ վերջը չի երևում: Դուք հավանաբար գիտեք, որ Գյումրիում դեռ կան անօթևան ընտանիքներ, բայց որոնց հանդեպ կարծես թե պետությունը պարտավորություն չունի, որովհետև տվել է բնակարան բոլոր այն մարդկանց, ովքեր երկրաշարժի հետևանքով են կորցրել: Մարդիկ կան՝ իրենք մեղավոր չեն, որ այսօր իրենք անօթևան են. ենթադրենք պետությունը երկու սենյականոց կորցրած ընտանիքին՝ 4 անդամից բաղկացած, տվել է 2 սենյակ, իսկ այդ 4-ը դարձել է 14, ընտանիքը մեծացել է, կիսվել է, մի մասը գնացել է, մյուս մասը մնացել: Իրականում խնդիր կա Գյումրիում, ես որպես գյումրեցի եմ նաև այդ հարցը տալիս: Իրականում այնտեղ վերահաշվարկ, նոր գույքագրում, նորից հաշվառում անելու, գնահատելու անհրաժեշտություն կա, թե իրականում ինչ իրավիճակ է: Արդյոք կառավարությունն այս ամբողջ ծրագրերի շրջանակներում տեսնում է որևէ խնդրի լուծում կամ մտածում է այդ մասին: Կոնկրետ 1000-ից ավելի, գուցե նաև տվյալների մեջ որոշակի շեղումներ կան, մի տվյալով մի քիչ քիչ է հազարից կամ շատ է, բայց խնդիրը կա և բավականին մեծ ծավալով:
ՀՀ վարչապետ Կարեն Կարապետյան– Մենք կառավարության ծրագրի մեջ ձևակերպել ենք, որ երկրաշարժից հետո բնակարանաշինարարական խնդիրը զուտ երկրաշարժից տուժածների առումով 2017թ.-ին ավարտում ենք: Դուք կարող եք այդ կետը կարդալ: Մի քանի անգամ հարցրել եմ, որովհետև ասում են՝ մենք ունենք ֆիքսած N բնակարան լուծելու հարց, որը գալիս է 1988 թվականից: Նշանակո՞ւմ է, որ դա Գյումրիում ընդհանրապես բնակարանային խնդիրը լուծվել է՝ ո՛չ, նշանակո՞ւմ է, որ մենք այլ քաղաքներ չունենք, որտեղ բնակարանային խնդիր կա՝ ոչ, պե՞տք է այդ հարցի շուրջ մտածենք՝ պետք է: Ո՞նց պետք է մտածենք՝ պետք է մտածենք այն կարողությունների չափով, որը մեր բյուջեի տեսքով ունենք: Ունե՞նք կապիտալ շինարարության որոշակի ծավալ, մե՞ծ են, համահու՞նչ են այն պահանջարկին և սպասումներին, որ հասարակությունն ունի՝ ո՛չ, ինչո՞ւ, որովհետև կարողություն չունենք, ի՞նչ պետք է անենք՝ փորձենք ավելի հարուստ լինենք և քայլ առ քայլ գնանք առաջ: Որևիցե գաղտնիք դրանում չկա, սա է:
Բաբկեն Թունյան, «168 ժամ» թերթ– Դուք կառավարման նոր մոտեցումներ եք առաջարկում, Ձեր քայլերի մեջ նորույթներ կան, բայց մյուս կողմում Ձեր օրոք երրորդ ընթերցմամբ ընդունվեց Հարկային օրենսգիրքը, որն այսպես էլ միանշանակ չէր: Ես խնդրում եմ պատասխանեք, հնարավո՞ր է, որ դա որոշ ժամանակ հետո փոփոխությունների ենթարկվի, բացառում եք, թե ոչ փոփոխությունների հնարավորությունը:
ՀՀ վարչապետ Կարեն Կարապետյան – Իմ վերաբերմունքը Հարկային օրենսգրքին երկակի է: Մի կողմից ինքն իրավունք ունի ապրելու և տրամաբանություն կա դրա տակ: Ուղղակի մի արձագանք կա բիզնես միջավայրից, որն ասում է՝ գիտեք ինչ, ովքեր որ սպիտակ դաշտում աշխատում են, դուք իրենց պատժում եք դրա համար և իրենց բեռն աճում է, և ստվերին չեք վերաբերում, ստվերի հետ չեք աշխատում: Դրա մեջ իրականում կա տրամաբանություն, որ սպիտակ դաշտի բեռը բարձրացել է: Եթե մեզ հաջողվի տնտեսության մեջ արդար հավասար պայմաններ ստեղծենք, վաղը մյուս օր, ինչպես գազի գնի հետ ենք վարվել, մենք հասկանանք, որ բիզնեսի հարկային բեռը իջեցնելով՝ մենք կարող ենք աշխուժություն մտցնել, բիզնեսը վերարտադրվի և մի միավորից քիչ վճարելով մեզ՝ ընդհանուր հոսքը դեպի բյուջե շատացնի: Անե՞նք, թե՞ չէ՝ միանշանակ անենք, բացառո՞ւմ եմ դա՝ չեմ բացառում, ինչքա՞ն արագ այդ հնարավորությունը կլինի՝ ցույց կտա մեր էֆեկտիվ աշխատանքը կամ ոչ էֆեկտիվ աշխատանքը, ինչպես նաև, թե ինչպես բիզնես միջավայրը, աշխատող մարդը կարձագանքի մեր քայլերին:
Մերի Դավթյան, «Արցախ թայմս» լ/կ – Պարոն Կարապետյան, հարցը Ձեզ եմ ուզում ուղղել, բնականաբար, Արցախին վերաբերող: Ձեր նշանակումով մեծ են սպասելիքները, ուզում եմ հարցնել ներդրումային զարգացման քաղաքականության հարցը, ի՞նչ հեռանկարներ կարող ենք ձեզանից ակնկալել: Այսօր ավելի մեծ լծակներ ունենալով ի՞նչ կարելի է անել՝ հաշվի առնելով Արցախի մեկուսացվածությունը և, իհարկե, արտաքին հարաբերությունների պակասը:
ՀՀ վարչապետ Կարեն Կարապետյան –Այս առումով, կարծում եմ, որ Արցախի Հանրապետության կառավարությունն ունի բավականին հստակ հաջողություններ, համարձակ քայլեր: Այդ համարձակության մեջ մի շարք կարևոր գրավական կա՝ իրենք չեն վախենում ասել ինչում են սխալվել, և ընդհանրապես, անսխալ մարդ գոյություն չունի: Անսխալ մարդը ոչ մի բան չանողն է: Ես չեմ բացառում, որ մեր կառավարությունը կունենա սխալներ: Եթե մենք համարձակություն ունենանք մեր սխալները բարձրաձայնել, ինքներս քննադատաբար վերաբերվենք դրան և ուղղենք, կարծում եմ դա տրամաբանական է: Ինչպես կանդրադառնանք Արցախին, նախ և առաջ մենք այսօր պայմանավորվել են էներգետիկայի և բոլոր այն ոլորտներում՝ ջրային տնտեսության, գյուղատնտեսության, թե ինչպես ենք համագործակցում: Երկրորդ՝ մենք պայմանավորվել ենք, օրինակի համար, վիճակագրության այն մոդելը, որը Լեռնային Ղարաբաղը կիրառում է, մենք տրանսֆորմացիա անենք մարզերի վրա:Մասնավորապես՝ Սյունիքի մարզպետը այստեղ էր և խնդրել ենք, որպեսզի փորձի փոխանակումը լինի, որպեսզի յուրաքանչյուր մարզպետ իր տարածքին, իր կտոր երկրին վերաբերվի որպես փակ համակարգ՝ ՀՆԱ, աշխատող, չաշխատող, հաշմանդամություն ունեցող բնակչություն, պոտենցիալ, երկրի զարգացման հիմնադրամ, տեղի բիզնես՝ ոնց կարող է բիզնեսը զարգանալ և այլն:
Ո՞նց ենք մենք աջակցելու Արցախին, ես այս պահին մեկ, երկու, երեք ծրագիր չեմ կարող ասել, բայց եթե մենք կարողանանք աշխուժացնել Հայաստանի Հանրապետության տնտեսությունը, դա մուլտիպլիկատիվ էֆեկտ է տալու, եթե մենք աշխուժացնում ենք այնտեղ, աշխուժանում է աստեղ, նույնիսկ հակառակը, ուղղակի մեր չափերով մեծ լինելը Արցախի վրա ավելի շատ է ազդում:
Նորայր Հովսեփյան, Արցախի հանրային հեռուստաընկերություն–Երկրորդ հարցս Հայաստանի վարչապետին է ուղղված, պարզապես վիճակագրական, օրինակ նույն ՏՏ ոլորտը, որ գտնում եք, որ պետք է լինի շարժիչ ուժը, Հայաստանում, եթե չեմ սխալվում, մոտ 450-500 կազմակերպություն կա, Արցախում ներկայացված է 4-5-ը, լավ մինչև 10-ը: Ինչպե՞ս եք պատկերացնում այդ մեխանիզմները, մանավանդ, որ Արցախը կարծես շատ ճյուղավորված ներուժ ունի և՛ հողային առումով, և՛ հնարավորությունների:
ՀՀ վարչապետ Կարեն Կարապետյան- Ինչ վերաբերում է ՏՏ ոլորտին՝ ես չեմ կարող ասել ինչքան ձեռնարկություն կա, ինչ տեմպերով կզարգանան: Մենք երեքշաբթի խոսելու ենք և խոսելու ենք այնքան ժամանակ, մինչև լուծումներ գտնենք: Կցանկանայի՞ ես, որպեսզի դա նաև Արցախի Հանրապետություն տարածվեր, իհարկե այո: Մենք այսօր վարչապետի հետ խոսել ենք: Այստեղ տարածքների ազատության, մարդկային կապիտալի խնդիրը չէ, մարդկային կապիտալի որակի խնդիրն է: Այսօր, օրինակ, ամենամեծ խոչընդոտը Հայաստանի Հանրապետությունում այս ոլորտը զարգացնելու համար, դա մասնագետն է: Մասնավորապես՝ թեմաներից մեկը, որ մենք խոսում ենք. իրենք ասում էին, որ շուկան պահանջարկ կձևավորի տարեկան 2000 մասնագետի: Եվ որպեսզի այդ ոլորտը զարգացնենք, մենք պետք է համատեղ մտածենք, ոնց ենք կրթական համակարգը փոփոխում այնպես, որպեսզի տարեկան 2000 մասնագետ տա: Կկարողանա՞նք մենք այս որակի մարդկային կապիտալի մեջ ներգավենք Արցախի Հանրապետությունը՝ ժամանակը ցույց կտա: Համենայն դեպս, ես պատրաստ եմ ամեն ինչ անել դրա համար, որովհետև դա կարևոր է: Բացի նրանից, որ էֆեկտիվ է ու արդյունավետ, շահավետ է, նաև որակ, միջավայր փոխող է:
Լուսինե Ավանեսյան, Արցախի հանրային հեռուստաընկերություն -Ձեր այս մեկուկես ամսվա գործունեության ընթացքում Հայաստանի Հանրապետության ներքին կյանքում ակնհայտ է, որ ինչ-որ մոտեցումներ են փոխվել: Հետաքրքիր է՝ փոխվե՞լ են կամ փոխվելո՞ւ են այդ մոտեցումները նաև Արցախի հետ հարաբերություններում, որովհետև այսպիսի հանդիպումներն ավելի շատ պաթետիկ նոտայի վրա են դիտարկվում և գործնական քայլերն ավելի քիչ են, քան այն ոգին, որ կա այդ հանդիպումներում: Ասենք՝ Ձեր նախորդներն էլ հիացական ձևակերպումներ էին տալիս արցախյան ոչ ստանդարտ մոտեցումներին:
ՀՀ վարչապետ Կարեն Կարապետյան- Շատ է խոսվում, ասվում, որ Հայաստանի Հանրապետությունում, հասարակության մեջ ձևավորվել են սպասումներ և այլն: Ես, կարծեմ, պատասխանել եմ՝ ինչպես եմ վերաբերվում այդ սպասումներին: Ձևակերպեմ այսպես, մի քանի թեզ. առաջինը՝ որևէ իլյուզիա չունեմ, երկրորդը՝ դրանով մեր կառավարությունը հայտնվո՞ւմ է օդերի մեջ, իրեն զգո՞ւմ է մի քիչ այլ կարգավիճակով՝ ոչ , երրորդը՝ դա պարտավորեցնում է, չորրորդը՝ դա անհանգստացնում է, որպեսզի հասարակությունը սպասումների մեջ լինի ռեալիստական: Ինչպե՞ս իմ հիացմունքն Արցախով կազդի իմ աշխատանքի վրա կամ ինչպե՞ս է ազդել նախկին իմ գործընկերների վրա: Ասեմ ձեզ, Արցախով չհիանալը բարդ է, եթե դրանից հետո մի բան կարողանում ես Արցախի համար անել, ապա լավ է, եթե չես էլ կարողանում անես, գոնե հիանում ես՝ էլի վատ չէ:
Նելլի Բաբայան, «Առավոտ» օրաթերթ - Պարոն Կարապետյան, այնուամենայնիվ, առանց Ձեր ասելու էլ, մենք վստահ ենք, որ Դուք կարճ ժամանակով չէիք գա վարչապետ, որովհետև Ձեզ ժամանակ է հարկավոր աշխարհը շուռ տալու համար: Առաջիկա ընտրություններից հետո Ձեզ ո՞ր պաշտոնում եք տեսնում:
ՀՀ վարչապետ Կարեն Կարապետյան – Համենայն դեպս, Դուք զգում եք, թե ոչ, այսօր, ընդհանրապես ոչ միայն այսօր, կամայական հարցազրույցի ժամանակ ես միշտ մաքսիմալ անկեղծ եմ: Համենայն դեպս, երբևցե սուտ չեմ ասում: Իմ պաշտոնի վերաբերյալ, ես երազե՞լ եմ Հայաստանի Հանրապետության վարչապետ լինել՝ ոչ: Պատասխանել եմ էդ հարցին, կրկնվում եմ: Հիմա ցանկությո՞ւն ունեմ, եթե կարող եմ ինչ-որ ձևով օգտակար լինել՝ այո, անհանգի՞ստ եմ մեր տնտեսությունից, մեր երկրի վաղվա օրվանից, ինչպես մեծ մասը մեր ազգի՝ այո: Հիմա ժամանակը ցույց կտա՝ էֆեկտիվ կլինենք, թե ոչ: Նախապես ասել, թե ես ինձ ինչ պաշտոնում եմ տեսնում, առնվազն կոռեկտ չէ:
Բելլա Լալայան, Արցախի Հանրային ռադիո- Պարոն վարչապետ, ո՞րն է Ձեր պատկերացրած Հայաստանն այդ ծրագրերի արդյունքում:
ՀՀ վարչապետ Կարեն Կարապետյան –Արդար, անկախ, ժամանակակից, ինտելեկտուալ և անվտանգ:
Բելլա Լալայան, Արցախի Հանրային ռադիո - Շատ կարևոր է հանրության, հասարակության տրմադրությունն այս պահի դրությամբ, որովհետև նրանց մոտ հույս է արթնացել, բայց Ձեր նշանակած նախարարն, այսօր համացանցում կարդացի առողջապահության նախարարի ոչ կոռեկտ հայտարարությունը՝ «Ես մեկ-երկու մահացած ծննդկանի դեպքով չեմ զբաղվում », շատ խիստ բացասական արձագանք է ստացել:
ՀՀ վարչապետ Կարեն Կարապետյան - Ալթունյան Լևոնի հայտարարության վերաբերյալ: Կարծեմ՝ Ալթունյան Լևոնն արձագանքել է, ճիշտ ասած ես չեմ լսել իր խոսքը: Այսպես ասեմ՝ եթե Ալթունյան Լևոնը նման բան է ասել, ապա ես Ալթունյան Լևոնին մինչ այդ չեմ ճանաչել: Իսկ ես նրան լավ եմ ճանաչում, համարում եմ իրեն շատ բարոյական մարդ, համարում եմ պոտենցիալ կառավարիչ, որը կարող է առողջապահության համակարգում մեծ փոփոխություններ անել, փոփոխություններն ուղղված են մարդուն, քաղաքացուն բավարարելուն և ադմինիստրատիվ կառավարման թերություններն ուղղելուն: Ուղղակի ես չեմ հավատում որ ինքն այդպես է մտածում, այդպես ասել է: Ես անպայման նայելու եմ, տեսնելու եմ:
Շնորհակալություն, ձեզ լավ տրամադրություն: