ուրբաթ, 2 նոյեմբերի 2012
ՀՀ պաշտպանության նախարարության թիմը դարձել է «ՀՀ վարչապետի գավաթ-2012» ֆուտբոլային մրցաշարի հաղթող
Վարչապետ Տիգրան Սարգսյանը Երևանի Վազգեն Սարգսյանի անվան Հանրապետական մարզադաշտում ներկա է եղել «Հայաստանի Հանրապետության վարչապետի գավաթ-2012» ֆուտբոլային մրցաշարի եզրափակիչ խաղին, որում մրցել են ՀՀ պաշտպանության նախարարության և Կրթության ու գիտության նախարարության թիմերը: 5-0 հաշվով առավելության է հասել ՊՆ թիմը և ճանաչվել մրցաշարի հաղթող: Երրորդ հորիզոնականը զբաղեցրել է Ոստիկանության թիմը:
ՊՆ թիմի ֆուտբոլիստներին հաղթական գավաթը հանձնել է անձամբ վարչապետը: Շնորհավորելով պաշտպանական գերատեսչության ֆուտբոլիստներին` վարչապետը նշել է. «Այս մրցաշարում հաղթողներ և պարտվողներ չկան: Ինչպես հայկական բանակի հաղթանակը, պաշտպանության նախարարության այս հաղթանակը ևս բոլորինս է»:
Մրցանակներ են հանձնվել նաև լավագույն դարպասապահ, պաշտպան, կիսապաշտպան, խաղացող, ռմբարկու, ամենակարգապահ թիմ, լավագույն քաղծառայող անվանակարգերում:
«ՀՀ վարչապետի գավաթ-2012» ֆուտբոլային մրցաշարին մասնակցել են պետական կառավարման մարմինների 14 թիմեր: Մրցաշարի հիմնադիրը ՀՀ կառավարությունն է, իսկ անմիջական կազմակերպիչը և իրականացնողը՝ ՀՀ սպորտի և երիտասարդության հարցերի նախարարությունը: Մրցաշարին իր լուրջ ու գործուն աջակցությունն է ցուցաբերել Հայաստանի ֆուտբոլի ֆեդերացիան:
Մրցաշարի անցկացման նպատակը պետական կառավարման մարմինների աշխատակիցների ֆիզիկական ակտիվացմանը և նրանց շրջանում մասսայական սպորտի ու առողջ ապրելակերպի արմատավորմանը նպաստելն է:
