երեքշաբթի, 13 հունիսի 2000
Այսօր վարչապետ Անդրանիկ Մարգարյանը հանդիպեց Հայաստանի Հանրապետությունում հավատարմագրված դեսպաններին ու ժամանակավոր հավատարմատարներին, միջազգային կազմակերպությունների ներկայացուցիչներին:
Հանդիպման մասնակիցները մեկ րոպե լռությամբ հարգեցին Սիրիայի Արաբական Հանրապետության նախագահ Հաֆեզ Ասադի հիշատակը:
Ողջունելով ներկաներին, Անդրանիկ Մարգարյանը կարևորեց այն բարյացակամ վերաբերմունքն ու զորակցությունը, որ անցումային դժվարին շրջանում ցուցաբերում են ՀՀ-ում ներկայացված եկրները:
Վարչապետը նշեց, որ թեև Հայաստանը կարողացավ դուրս գալ հոկտեմբերի 27-ի ողբերգական իրադարձությունների հետևանքով ստեղծված ներքաղաքական ճգնաժամից, սակայն դրա բացասական հետևանքները դեռ ամբողջովին հաղթահարված չեն` մասնավորապես երկրի տնտեսական կյանքում և հասարակության հոգեբանության մեջ: Այս առումով կարևորվում է ժողովրդի սոցիալ-տնտեսական իրավիճակի բարելավումն ու իշխանությունների նկատմամբ մարդկանց վստահության և ապագայի հանդեպ հավատի վերականգնումը:
Անդրանիկ Մարգարյանը հավաստիացրեց, որ կառավարությունը հետևողականորեն շարունակելու է բարենորոգումների քաղաքականությունը: Նրա խոսքերով, առաջնային նպատակներից են ժողովրդավարության ամրապնդումն ու խորացումը, քաղաքացիական հասարակությունը ձևավորող ինստիտուտների և սկզբունքների հաստատումն ու կիրառումը:
Վարչապետն առանձնահատուկ կարևորեց Հայաստանի և արտերկրի միջև տնտեսական հարաբերությունների հետագա զարգացումը: Ըստ Անդրանիկ Մարգարյանի, օտարերկրյա կառավարությունների ու գործարարների կողմից վարկային ծրագրերի իրականացումը, ներդրումների խթանումը, երկկողմ առևտրի աշխույժացումը կնպաստեն Հայաստանի առջև ծառացած հիմնախնդիրների արդյունավետ լուծմանը: Կառավարությունն ամենայնս նպաստելու է ներդրողների գործունեության ծավալմանը, ստեղծելու է բարենպաստ պայմաններ, իրավական դաշտ և առևտրային ռեժիմ:
Հայաստանի Հանրապետությունում հավատարմագրված դիվանագիտական կորպուսի անունից խոսք ասաց Հայաստանում Ֆրանսիայի արտակարգ և լիազոր դեսպան Միշել Լեգրան` որպես մեր երկրում ամենաերկար աշխատած դիվանագետ: Հաջողություն մաղթելով վարչապետին` ստանձնած պատասխանատու աշխատանքում, Միշել Լեգրան իր գործընկերների անունից մասնավորապես նշեց, որ պատրաստակամ են հետագայում ևս աջակցել կառավարության կողմից իրականացվող ծրագրերին, հատկապես` օտարերկրյա ներդրումերին առնչվող:
Վարչապետ Անդրանիկ Մարգարյանը հույս հայտնեց, որ համատեղ աշխատանքներին, կոնկրետ ծրագրերին վերաբերող հարցերը կքննարկվեն երկկողմ հանդիպումների ընթացքում:
