ուրբաթ, 23 հունիսի 2000
Այսօր վարչապետ Անդրանիկ Մարգարյանն ընդունեց Եվրամիության անդամ չորս երկրների՝ Ֆրանսիայի, Մեծ Բրիտանիայի և Հյուսիսային Իռլանդիայի Միացյալ Թագավորության,Գերմանիայի և Հունաստանի՝ ՀՀ-ում հավատարմագրված դեսպաններին:
Հանդիպման ընթացքում քննարկվեցին Եվրամիության, ինչպես նաև եվրոպական այլ կառույցների հետ Հայաստանի համագործակցությանը վերաբերող հարցեր, այն ներդրումային ծրագրերը, որոնք իրականացվում են հանրապետությունում: Իր գործընկերների անունից ՀՀ-ում Ֆրանսիայի արտակարգ և լիազոր դեսպան Միշել Լեգրան նշեց, որ Եվրամիության անդամ երկրները Հայաստանում կարևոր ներդնողներից են և հակված են աջակցելու ՀՀ կառավարությանը՝ բարեփոխումների իրականացման, տնտեսության վերականգնման խնդրում:
Պատասխանելով դեսպաններին հետաքրքրող հարցերին, վարչապետ Անդրանիկ Մարգարյանը ներկայացրեց այն միջոցառումները, որոնք ուղղված են երկրի սոցիալ-տնտեսական իրավիճակի բարելավմանը, ներդրումների համար նպաստավոր պայմանների ապահովմանը, օրենսդրական դաշտի կատարելագործմանը, կոռուպցիայի, բյուրոկրատական քաշքշուկների դեմ պայքարին: ՀՀ-ում սոցիալական խնդիրների լուծումը, արտագաղթի կասեցումը, բարոյահոգեբանական նորմալ մթնոլորտի ստեղծումը վարչապետը պայմանավորեց երկրում տնտեսության զարգացմամբ, աշխատատեղերի ստեղծմամբ, ներդրումների հոսքի ապահովմամբ:
Վարչապետը նշեց, որ կառավարությունում քաջատեղյակ են բոլոր այն դժվարություններին, որոնց Հայաստանում հանդիպում են օտարերկրյա ներդրողները: Նա կոնկրետ՝ «Արմենթելի», «Երևանի կոնյակի գործարանի» և այլ օրինակների վրա նշեց, թե ինչ միջոցառումներ են իրականացվում դրանց հաղթահարման ուղղությամբ: Հավաստիացվեց, որ ներդրումների ներգրավումը, գործարարության համար նպաստավոր պայմանների ստեղծումը, սկսած բարեփոխումների շարունակումը մնում են կառավարության առաջնահերթ խնդիրների թվում:
Հանդիման ընթացքում կարևորվեց Առևտրի համաշխարհային կազմակերպությանը, Եվրախորհրդին ՀՀ-ի անդամակցությունը, Լոնդոնում կայանալիք գործարար համաժողովի հաջող կազմակերպումն ու անցկացումը, միջազգային հանրությանը երկրի հնարավորությունների պատշաճ նեկայացումը, Հայաստանում զբոսաշրջիկության զարգացման անհրաժեշտությունը: Վարչապետը ներկայացնելով նշված հարցերի ուղղությամբ կառավարության ձեռնարկած միջոցառումները նշեց, որ ակնկալում է հետագա համագործակցություն և համատեղ աշխատանք:
