երկուշաբթի, 26 հունիսի 2000
Այսօր վարչապետ Անդրանիկ Մարգարյանն ընդունեց Հայաստանում Փախստականների հարցերով նորվեգական խորհրդի մշտական ներկայացուցիչ Յան Վիլյումսենին:
Ներկայացնելով ՀՀ-ում խորհրդի կատարած աշխատանքները, Յան Վիլյումսենը նշեց, որ դրանք առաջիկա տարիներին ևս իրենց շարունակությունը կունենան: Կազմակերպությունը Հայաստանում իր գործունեությունը սկսել է Սպիտակի երկրաշարժից անմիջապես հետո՝ զգալի օժանդակություն ցույց տալով աղետի գոտու բնակչությանը: Այս տարիներին մեծածավալ աջակցություն է ցույց տրվել Հայաստան եկած փախստականներին, գյուղական բնակչությանը՝ կառուցելով և նորոգելով բնակարաններ, դպրոցներ, ջրագծեր: Նորվեգական խորհրդի աջակցությամբ, մասնավորապես, կառուցվել է 3 և վերանորոգվել 30 դպրոց: 80 ընտանիքի համար բնակարաններ են կառուցվել Նոր Արտամեդում, իսկ շահագործման հանձնված ջրագծերի շնորհիվ ջրով ապահովվել է շուրջ 150.000 բնակիչ: Յան Վիլլյումսենի հավաստմամբ, նորվեգական կողմը մտադիր է շարունակել համագործակցությունը Հայաստանի հետ՝ ներառելով գործակցության նոր ոլորտներ:
Վարչապետ Անդրանիկ Մարգարյանը շնորհակալություն հայտնելով հանրապետության համար դժվարին տարիներին նորվեգական իշխանությունների, Փախստականների հարցերով նորվեգական խորհրդի ցուցաբերած աջակցության համար, հույս հայտնեց, որ ավանդույթներ ունեցող համագործակցությունը մարդասիրական օգնությունից կտեղափոխվի զարգացման ծրագրերի դաշտ: Վարչապետի խոսքերով, աշխատատեղերի ստեղծմամբ հնարավոր կլինի հաղթահարել սոցիալական շատ խնդիրներ:
