երեքշաբթի, 27 փետրվարի 2001
Այսօր կառավարությունում տեղի ունեցավ վարչապետին կից կանանց խորհրդի երկրորդ նիստը, որի օրակարգում անցած նիստի արդյունքում տրված հանձնարարականների` ՀՀ վարչապետին կից կանանց խորհրդի կանոնադրության 6-րդ կետի (այն վերաբերում է խորհրդի գործառույթներին) վերաբերյալ առաջարկությունների, խորհրդի նիստերում քննարկման ենթակա հարցերի ցանկի վերաբերյալ առաջարկությունների քննարկումն էր, ինչպես նաև նախատեսված էին ընթացիկ հարցեր:
Խորհուրդը հաստատեց ավելի քան մեկ տասնյակ դիտողություններն ու առաջարկները, որոնք արվել էին հետագա նիստերում քննարկման ենթակա հարցերի ցանկը լրացնելու վերաբերյալ: Դրանք ներառում են ամենատարբեր ոլորտներ` կրթական, առողջապահական, սոցիալական, մշակութային և այլն:
Կանոնադրութամբ ամրագրվելիք գործառույթների մասին առաջարկները որոշվեց քննարկել հաջորդ հանդիպմանը, երբ խորհրդի բոլոր անդամները մանրամասն կծանոթանան ներկայացված դիտողություններին և առաջարկներին ու կունենան իրենց հստակ դիրքորոշումը:
Վարչապետի առաջարկով խորհուրդն այսօրվա նիստում ձևավորեց նաև աշխատանքային խմբեր, որոնք պետք է նիստից նիստ ընկած ժամանակահատվածում ակտիվ աշխատեն` կատարելով խորհրդի հանձնարարականները: Ըստ այդմ, ստեղծվեց 4 աշխատանքային խումբ` մշակութային, կրթության, սոցիալական-առողջապահական, պետական մարմինների և հասարակական կազմակերպությունների հետ փոխհարաբերությունների:
