երեքշաբթի, 25 հուլիսի 2000
Այսօր վարչապետ Անդրանիկ Մարգարյանի մոտ տեղի ունեցած խորհրդակցությունում քննարկվեցին մայրաքաղաքի և հանրապետության մարզերի հանրակրթական դպրոցների ընթացիկ նորգման նպատակով պետական բյուջեից 1999 թ. հատկացված գումարների ծախսման ստուգման արդյունքների և 2000 թ. նախատեսված միջոցների բաշխման վերաբերյալ հարցերը:
Խորհրդակցությունում հրապարակվեցին ՀՀ ֆինանսների և էկոնոմիկայի նախարարության ֆինանսական վերահսկողության գլխավոր վարչության և վարչապետի վերահսկողության ծառայության կողմից կատարված ստուգումների և ուսումնասիրությունների արդյունքները, ըստ որոնց, արձանագրվել են 66761,2 հազար դրամի հավելագրումներ, այդ թվում` շինաշխատանքների ծավալների գծով` 51866,5 հազար դրամ, շինանյութերի գների բարձրացման և վերադիր ծախսերի գործակիցների ավելացման հետևանքով` 14894,7 հազար դրամ: Ստուգումների ընթացքում կապալառու կազմակերպությունների կողմից բյուջե է վերադարձվել 654 հազար դրամ, հավելագրված ծավալների դիմաց կատարվել են 10247 հազար դրամի շինվերանորոգման աշխատանքներ:
Վարչապետ Անդրանիկ Մարգարյանը հանձնարարեց նշված փաստերի հետ կապված բացատրություններ ներկայացնել ՀՀ ֆինանսների և էկոնոմիկայի նախարարություն` ամփոփագիրը վերջնական տեսքի բերելու համար: Նա հավաստիացրեց, որ այն, ինչ տեղի է ունեցել 1999 թ., այս տարի չի կրկնվի: Թերացումների համար պատասխանատվություն կկրեն բոլոր մեղավորները` անկախ զբաղեցրած պաշտոնից: «Չի կարելի անընդհատ խոսել երիտասարդ սերնդի դաստիարակության խնդիրներին նվիրված լինելու մասին, իսկ գործով հակառակն ապացուցել», -նշեց վարչապետը:
2000 թ. հանրակրթական դպրոցների շենքերի նորգման համար գումարը հատկացվում է պետական ձեռնարկությունների և անավարտ շինարարության օբյեկտների սեփանակաշնորհումից ստացված միջոցների հաշվին: Բարդություն է առաջացրել այն հանգամանքը, որ մարզպետների ներկայացրած վերականգման ենթակա դպրոցների նախնական ցուցակները հետագայում նրանց կողմից փոփոխության են ենթարկվել: Հանձնարարվեց երկօրյա ժամկետում կրթության և գիտության նախարարության հետ վերջնական տեսքի բերել նորոգվելիք դպրոցների ցանկը: Հանձնարարական տրվեց նաև առաջիկայում կառավարության նիստի քննարկմանը ներկայացվելիք որոշման նախագծում ներառել գումարների բաշխման և աշխատանքների կազմակերպման այնպիսի մեխանիզմներ, որոնք կբացառեն որևէ չարաշահում:
