հինգշաբթի, 27 հուլիսի 2000
Կառավարությունն ընդունեց «փոքր» և անավարտ շինարարության օբյեկտների մասնավորեցումն ապահովող միջոցառումների մասին որոշում, որով ի թիվս այլ հանձնարարականների, նախատեսվում է մինչև սեպտեմբերի 10-ը ամփոփել նշված օբյեկտների հաշվառման, դասակարգման և փաստացի վիճակի ուսումնասիրությունների արդյունքներն ու դրանց մասնավորեցման վերաբերյալ կառավարություն ներկայացնել համապատասխան որոշման նախագծերը:
Մեկ այլ որոշմամբ, կառավարությունը որոշակի լրամշակմամբ, հաստատեց 2000 թ. պետական ձեռնարկությունների և անավարտ շինարարության օբյեկտների սեփականաշնորհումից ստացված միջոցների հաշվին նորոգվելիք հանրակրթական դպրոցների անվանացանկը:
Ընդունված հաջորդ որոշումը վերաբերում էր առևտրային կազմակերպություններում ՀՀ մասնակցությունից ստացվող շահաբաժինների գծով սահմանված եկամուտների` 2000 թ. պետական բյուջե հավաքագրման աշխատանքների կազմակերպմանը: Այս որոշումով մասնավորապես նախատեսվում է կարճ ժամկետում ապահովել 50 տոկոսից ավելի պետական մասնակցությամբ առևտրային կազմակերպություններում պետությանը պատկանող բաժնեմասի 15 տոկոսի չափով շահաբաժինների վճարումը ՀՀ պետբյուջե:
Կառավարությունը հաստատեց ՀՀ սոցիալական ապահովագրության պետական հիմնադրամի 2000 թ. բյուջեն, որի եկամուտներն ու ծախսերը նախատեսված են 43 մլրդ 614 մլն-ական դրամ:
Մեկ այլ որոշմամբ մասնակիորեն ուժը կորցրած համարվեց կառավարության 1999 թ. ապրիլի 22-ի «Տավուշի մարզի Բագրատաշենի սահմնամերձ առևտրի շուկայի գործունեությունը կանոնակարգելու մասին» որոշումը: Նոր որոշմամբ հանձնարարվում է 5-օրյա ժամկետում շահագրգիռ գերատեսչությունների հետ համաձայնեցնել և հաստատել Բագրատաշենի սահմանմերձ առևտրի շուկայի հատակագիծը, շուկայի տարածքի ընդլայնման հետ կապված` 10-օրյա ժամկետում կազմակերպել ժամանակավոր շինությունների սահմանված կարգով տեղափոխումը:
ՀՀ կառավարության գործունեության ծրագրի կատարումն ապահովող միջոցառումների մասին որոշման նախագծի լրամշակված տարբերակը, նախարարությունների վերջնական առաջարկություններով, կներկայացվի հաջորդ նիստի քննարկմանը:
