հինգշաբթի, 25 սեպտեմբերի 2014
Հովիկ Աբրահամյանն ընդունել է ԱՊՀ երկրների հարկային ծառայությունների ղեկավարներին
Վարչապետ Հովիկ Աբրահամյանն ընդունել է ԱՊՀ երկրների հարկային ծառայությունների ղեկավարների համակարգման խորհրդի 21-րդ նիստի մասնակիցներին:
Ողջունելով հյուրերին կառավարությունում՝ Հովիկ Աբրահամյանը վստահություն է հայտնել, որ նրանց այցը Երևան նոր թափ կհաղորդի ԱՊՀ երկրների միջև այս բնագավառում համագործակցության զարգացմանը: Վարչապետը նշել է, որ Հայաստանի կառավարությունը կարևորում է գործարար և ներդրումային դաշտի բարելավումը, այդ թվում` հարկային ոլորտի զարգացումը: «Այս համատեքստում Հայաստանի կառավարությունն առաջնային ուշադրություն է դարձնում հարկային և մաքսային ծառայությունների գործունեության բարելավմանը: Փոքր և միջին բիզնեսի համար մշակվել է հարկային քաղաքականության պարզեցման նոր ծրագիր, ներդրվել է հարկային հաշվետվությունների ներկայացման էլեկտրոնային համակարգ, ստեղծվել է համապատասխան ենթակառուցվածք՝ հարկատուներին որակյալ ծառայություններ մատուցելու համար»,- ընդգծել է կառավարության ղեկավարը:
ԱՊՀ երկրների հարկային ծառայությունների ղեկավարները շնորհակալություն են հայտնել վարչապետին ընդունելության համար և մանրամասներ ներկայացրել նիստի ընթացքում քննարկվող հարցերի վերաբերյալ: Նրանք նշանակալի են համարել Հայաստանում հարկային ծառայության բնագավառի զարգացմանն ուղղված քայլերը և կարևորել փորձի փոխանակումը:
Զրուցակիցները նշել են, որ ունեն ընդհանուր նպատակներ և իրենց առջև ծառացած խնդիրները, ինչպիսիք են՝ հարկային բնագավառում կարգապահության բարձրացումը, հարկատուների համար վարչարարության կրճատումը, հնարավոր կլինի լուծել միայն համատեղ ջանքերով:
Հանդիպման մասնակիցները վստահություն են հայտնել, որ այդ նպատակները կիրականան նաև ժամանակակից տեխնոլոգիաների կիրառման և փորձի փոխանակման միջոցով, իսկ նման միջոցառումները կնպաստեն փոխգործակցության ամրապնդմանն ու խորացմանը:
