ուրբաթ, 17 հոկտեմբերի 2014
ՀՀ կառավարությունը և ՄԱԿ-ի Մանկական հիմնադրամը կշարունակեն արդյունավետ համագործակցությունը
Վարչապետ Հովիկ Աբրահամյանն ընդունել է ՄԱԿ-ի Մանկական հիմնադրամի՝ (UNICEF) Կենտրոնական ու Արևելյան Եվրոպայի և ԱՊՀ-ի տարածաշրջանային տնօրեն Մարի-Պիեր Պուարիեին: Տիկին Պուարիեն գտնվում է Հայաստանում՝ Երևանում կազմակերպված ՄԱԿ-ի մանկական հիմնադրամի գործունեությունը նշված տարածաշրջանում համակարգողների տարեկան հավաքին մասնակցելու նպատակով:
Վարչապետը բարձր է գնահատել ՄԱԿ-ի Մանկական հիմնադրամի դերը` մեր երկրում երեխաների իրավունքների պաշտպանության, նրանց առողջության ու կյանքի պայմանների բարելավման գործում: Արդյունավետ համարելով կառույցի գործունեությունը՝ կառավարության ղեկավարը պատրաստակամություն է հայտնել այսուհետ ևս շարունակել աջակցել հիմնադրամի յուրաքանչյուր նախաձեռնության: Հովիկ Աբրահամյանը կարևորել է ՅՈՒՆԻՍԵՖ-ի կողմից Հայաստանում իրականացվող բազմաթիվ ծրագրերը և հավաստիացրել, որ հետևողական է լինելու ձեռք բերված պայմանավորվածությունների իրականացման հարցում:
Մարի-Պիեր Պուարիեն ողջունել է ՀՀ կառավարության բարեփոխումները երեխաների պաշտպանության ոլորտում և վերահաստատել ՄԱԿ-ի Մանկական հիմնադրամի՝ ՀՀ կառավարությանն այդ գործում օժանդակելու պատրաստակամությունը: Այս համատեքստում ՅՈՒՆԻՍԵՖ-ի տարածաշրջանային տնօրենը բարձր է գնահատել սոցիալական ինտեգրված ծառայությունների համակարգի ներդրումը Հայաստանում, որի հաջողված փորձն ուսանելի օրինակ կարող է ծառայել նաև տարածաշրջանի մյուս երկրների համար:
Տիկին Պուարիեն շնորհակալություն է հայտնել ՅՈՒՆԻՍԵՖ-ի տարեկան հավաքը Երևանում պատշաճ մակարդակով կազմակերպելու համար, որի շրջանակում քննարկվել է նաև Հայաստանի հետ առաջիկա հինգ տարվա համագործակցության ծրագիրը: «Մեր գործընկերության ամենակարևոր առանձնահատկությունն այն է, որ ուշադրության կենտրոնում երեխան է՝ համակողմանի խնդիրներով, ոչ թե ոլորտային մոտեցումը», - նշել է ՅՈՒՆԻՍԵՖ-ի տարածաշրջանային տնօրենը և գոհունակություն հայտնել պատկան նախարարությունների, առաջին հերթին, ՀՀ աշխատանքի և սոցիալական հարցերի նախարարության հետ համագործակցության ընթացքից:
Երկուստեք ընդգծվել է, որ Հայաստան-ՅՈՒՆԻՍԵՖ համագործակցության նոր ծրագրի հիմքում պետք է լինի ՀՀ-ում երեխաների իրավիճակի հետ կապված մարտահրավերների հաղթահարումը՝ աջակցություն երեխաների առավել խոցելի խմբերին, մանկատների բեռնաթափում և այլն:
