ուրբաթ, 24 հոկտեմբերի 2014
Վարչապետն այցելել է Անշարժ գույքի կադաստրի պետական կոմիտեի նորաբաց գրասենյակ
Վարչապետ Հովիկ Աբրահամյանն այցելել է ՀՀ կառավարությանն առընթեր Անշարժ գույքի կադաստրի պետական կոմիտեի նորաբաց «Կենտրոն» սպասարկման ընդլայնված գրասենյակ: Հոկտեմբերի 20-ից գործող այս գրասենյակն ստեղծվել է կոմիտեի «Կենտրոն» և «Էրեբունի» սպասարկման գրասենյակների միավորմամբ:
Վարչապետ Աբրահամյանը շրջել է գրասենյակի տարածքում, ծանոթացել աշխատանքային պայմաններին և ստեղծված հնարավորություններին: Կառավարության ղեկավարը զրուցել է տեղում գործարք իրականացնող աշխատակիցների և քաղաքացիների հետ, հետաքրքրվել տրամադրվող ծառայությունների որակով և ընթացքով:
Լրագրողների հետ ճեպազրույցում Հովիկ Աբրահամյանը դրական է գնահատել կադաստրի պետական կոմիտեի կողմից իրականացվող բարեփոխումները, կարևորել էլեկտրոնային համակարգի ներդրումը, որը կնպաստի կոռուպցիոն ռիսկերի նվազեցմանը: «Վերջին հարցումների արդյունքում քաղաքացիների դժգոհությունը կադաստրի պետական կոմիտեից նվազել է: Բարեփոխումները պետք է շարունակվեն, և կառավարությունը հետևողական է լինելու, որպեսզի աշխատանքը լինի թափանցիկ, և քաղաքացի-աշխատակից շփումը նվազեցվի: Բոլոր գործարքները, որ իրականացնում է քաղաքացին, պետք է լինեն հեշտ ու մատչելի», - նշել է վարչապետը: Որպես հետագա քայլեր՝ կառավարության ղեկավարն անհրաժեշտ է համարել էլեկտրոնային համակարգի շարունակական ներդրումը և «մեկ պատուհանի» սկզբունքով աշխատանքի կազմակերպումը:
ՀՀ ԿԱ Անշարժ գույքի կադաստրի պետական կոմիտեի նորաբաց սպասարկման գրասենյակը հագեցած է ժամանակակից տեխնոլոգիաներով: Քաղաքացիներին տրամադրվում է անվճար խորհրդատվություն, գործում են հերթերի կառավարման և վճարման էլեկտրոնային համակարգեր, ներմուծվել է նոր՝ ծառայությունների տրամադրման որակի գնահատման և վերահսկման համակարգ, ստեղծվել են հարմարություններ՝ հաշմանդամ անձանց ազատ տեղաշարժն ապահովելու համար: Առանձին պատուհանի միջոցով կապահովվի զոհված ազատամարտիկների ընտանիքների անդամներին, Հայրենական մեծ պատերազմի, Արցախյան ազատամարտի մասնակիցներին, հաշմանդամներին, ինչպես նաև օրենսդրությամբ նրանց հավասարված անձանց արտահերթ սպասարկումը:
