Հայաստանի Հանրապետության Կառավարություն

Հայաստանի Հանրապետության վարչապետ Հովիկ Աբրահամյանն այսօր Ռուսաստանի Դաշնության Դաշնային ժողովի Դաշնության խորհրդի նախագահ Վալենտինա Մատվիենկոյի հետ «Երևան Էքսպո» ցուցահանդեսային կենտրոնում մասնակցել է Հայ-ռուսական միջտարածաշրջանային 4-րդ համաժողովի պաշտոնական բացմանը: Համաժողովն անցկացվում է «Հայաստան-Ռուսաստան. Եվրասիական տնտեսական միություն. միջտարածաշրջանային համագործակցության նոր հեռանկարներ» խորագրի ներքո:
Մինչ աշխատանքներն սկսելը համաժողովի մասնակիցները մեկ րոպե լռությամբ հարգանքի տուրք են մատուցել հոկտեմբերի 31-ին Շարմ Էլ-Շեյխից Սանկտ Պետերբուրգ ուղևորված ինքնաթիռի վթարի և նոյեմբերի 3-ին Տուլայի տարածաշրջանի Ուզլովսկի մոտ Մոսկվայից Երևան եկող ավտոբուսի վթարի պատճառով զոհվածների հիշատակին:
Հայ-ռուսական միջտարածաշրջանային 4-րդ համաժողովի մասնակիցներին ողջույնի ուղերձ են հղել ՀՀ նախագահ Սերժ Սարգսյանը և ՌԴ նախագահ Վլադիմիր Պուտինը: ՀՀ նախագահի ուղերձն ընթերցել է ՀՀ նախագահի աշխատակազմի ղեկավար Վիգեն Սարգսյանը, ՌԴ նախագահի ուղերձը՝ ՌԴ Դաշնային ժողովի Դաշնության խորհրդի նախագահ Վալենտինա Մատվիենկոն: Ապա ողջույնի խոսքով են հանդես եկել ՀՀ վարչապետ Հովիկ Աբրահամյանը և ՌԴ Դաշնային ժողովի Դաշնության խորհրդի նախագահ Վալենտինա Մատվիենկոն:
Ողջունելով Հայ-ռուսական միջտարածաշրջանային 4-րդ համաժողովի մասնակիցներին և հյուրերին՝ կառավարության ղեկավարը նշել է. «Համաժողովի պարբերական անցկացումն արդեն լավ ավանդույթ է դարձել: Տարածաշրջանների ղեկավարներին, գործարար աշխարհի, հասարակական, գիտական և ստեղծագործական մտավորականության ներկայացուցիչներին համախմբող այս ֆորումը դարձել է արդյունավետ հարթակ մեր երկրների դաշնակցային փոխգործակցության միջտարածաշրջանային մակարդակով հարցերի ամենալայն շրջանակի բաց քննարկումների համար:
Կցանկանայի ընդգծել, որ այս միջոցառումները ոչ թե ֆորմալ, այլ գործնական բնույթ են կրում: Միջտարածաշրջանային կապերի ամրապնդումը նպաստում է գործնական հարցերի լուծմանը, խթանում ներդրումների ներգրավումը և նորարարությունների աճը: Կարող ենք փաստել, որ մեր համագործակցությունն այս ձևաչափով կայացել է:
Արդիական է նաև համաժողովի առանցքային թեմայի ընտրությունը՝ «Հայաստան-Ռուսաստան. Եվրասիական տնտեսական միություն. միջտարածաշրջանային համագործակցության նոր հեռանկարներ»: Տնտեսական միությունը բազմապատկեց մեր երկրների ընդհանուր ներուժը, և նրա աշխատանքը հնարավորություն է տալիս վերացնել շատ խոչընդոտներ փոխշահավետ տնտեսական համագործակցության համար: Գրեթե մեկ տարի գործող Եվրասիական տնտեսական միությունն իրեն դրսևորել է որպես խոստումնալից ինտեգրացիոն միավորում, որն ունի աշխատուժի, ապրանքների, ծառայությունների և կապիտալի ազատ տեղաշարժի ապահովման մեծ ներուժ: Մեր ինտեգրացիոն կառույցներն անհրաժեշտ նախադրյալներ են ստեղծում առևտրատնտեսական կապերի հետագա ակտիվացման և ամրապնդման համար, բայց մենք ևս պետք է խթանենք ոչ միայն շրջանակային համաձայնագրերը, այլև կոնկրետ նախաձեռնությունները:
Հայաստանի Հանրապետության կառավարությունն անհրաժեշտ ուշադրություն է դարձնում միջտարածաշրջանային կապերի զարգացմանը, հատկապես փոքր ու միջին տնտեսվարող սուբյեկտների միջև շփումների հաստատմանը: Այսօր մեր առջև ծառացել են այնպիսի խնդիրներ, ինչպիսիք են ազգային տնտեսությունների արդիականացումն ու մրցունակության բարձրացումը, մարդկանց կյանքի որակի բարելավումը: Վստահ եմ, որ միջտարածաշրջանային մակարդակով արդյունաբերական գործակցության և առևտրի ակտիվացումը, ինչպես նաև կրթության, մշակույթի, սպորտի և զբոսաշրջության զարգացման ոլորտներում կապերի ընդլայնումը հետագայում նույնպես կնպաստեն մեր պետությունների ռազմավարական գործընկերության ամրապնդմանը:
Այս տարի ավելացել է գյուղատնտեսական ապրանքների արտահանումը Ռուսաստան, ինչը վկայում է ռուսաստանյան շուկայում մեր արտադրանքի պահանջված լինելու մասին: Այս միտումը պահպանելու համար պետք է ամեն կերպ զարգացնենք լոգիստիկան և փոխադարձ ներդրումները, ավելի բարենպաստ պայմաններ ստեղծենք բիզնեսի համար: Հենց այդ նպատակով էլ հանդես եկանք ԱԱՀ վերադարձման պարզեցված մեխանիզմների ներդրման նախաձեռնությամբ:
Համաժողովի օրակարգում հատուկ ուշադրության է արժանացել նաև էներգետիկ համագործակցությունը: Ներկայիս պայմաններում անհրաժեշտ է բարձրացնել տնտեսությունների էներգետիկ արդյունավետությունը և զարգացնել այլընտրանքային աղբյուրները, ինչպես նաև մտածել ազգային փոխարժեքով էներգետիկ ռեսուրսների առևտրի շուրջ, ինչն զգալիորեն կնվազեցնի անկայունությունը մեր երկրների ներքին շուկաներում:
Համաժողովը պատշաճ ուշադրություն է դարձնում նաև հումանիտար ոլորտում համագործակցությանը, որը հատկապես կարևոր է մեր եղբայրական երկրների համար: Կարծում ենք, որ միջտարածաշրջանային համագործակցության շրջանակում բավական բարձր է շարունակում մնալ զբոսաշրջության ոլորտում չիրացված ներուժի մասնաբաժինը: Այդ նպատակով մենք արդեն հանդես ենք եկել առաջարկությամբ, որպեսզի Ռուսաստանի քաղաքացիները ներքին անձնագրերով կարողանան Հայաստան այցելել:
Ավարտելով խոսքս՝ մաղթում եմ բոլորին բեղմնավոր աշխատանք, իսկ տարածաշրջաններին՝ հետագա հաջողություններ ի շահ Հայաստանի և Ռուսաստանի ժողովուրդների: Վստահ եմ՝ ինչպես և նախորդ համաժողովները, այս համաժողովը ևս կոնկրետ արդյունքներ կարձանագրի ի նպաստ մեր երկրների և ժողովուրդների»:
Այնուհետև Հովիկ Աբրահամյանի և Վալենտինա Մատվիենկոյի ներկայությամբ ստորագրվել են տարբեր ուղղություններով երկկողմ համագործակցության զարգացմանը վերաբերող մի շարք փաստաթղթեր՝ ՀՀ Վայոց ձորի մարզի և ՌԴ Արխանգելսկի նահանգի միջև առևտրատնտեսական, գիտատեխնիկական և հումանիտար համագործակցության 2012 թ. համաձայնագրի իրագործման 2015-2017 թթ. միջոցառումների ծրագիրը, «Զարգացման միջպետական կորպորացիա» ԲԲԸ և Հայ-Ռուսական (Սլավոնական) համալսարանի միջև համատեղ գործունեության համաձայնագիրը, ՀՀ և ՌԴ բարձրագույն կրթության ուսումնական հաստատությունների ասոցիացիայի ձևավորման մտադրությունների մասին հուշագիրը և «Մոսկվորեցկի Առևտրի տուն» ՍՊԸ և «Հայաստանի ջերմոցային ասոցիացիա» գյուղատնտեսական ՀԿ միջև համագործակցության մասին հուշագիրը:
Հայ-ռուսական միջտարածաշրջանային համաժողովն անցկացվում է 2011 թվականից ՀՀ և ՌԴ նախագահների աշխատակազմերի աջակցությամբ՝ հնարավորություն տալով որակական նոր մակարդակի բարձրացնել երկկողմ հարաբերությունների միջտարածաշրջանային ձևաչափը: Ֆորումի նպատակն է՝ քննարկել տարբեր ոլորտներում համագործակցության խորացմանն ու զարգացմանը վերաբերող հարցեր, նպաստել ՀՀ մարզերի և ՌԴ տարածաշրջանների միջև համագործակցության ներուժի բացահայտմանը և նոր կապերի հաստատմանը: Միջտարածաշրջանային համագործակցության մեջ ներգրավված են ՀՀ բոլոր մարզերը, ՌԴ ավելի քան 70 դաշնային միավորներ: Նախկին համաժողովներից հետո կապեր են հաստատվել ՀՀ Վայոց ձորի մարզի ու ՌԴ Արխանգելսկի նահանգի, ՀՀ Լոռու մարզի ու «Հարավկոսվկասյան երկաթուղի» ընկերության միջև, քննարկվում են ՀՀ Սյունիքի մարզի և ՌԴ Վոլգոգրադի նահանգի, ՀՀ Արարատի մարզի և ՌԴ Ռոստովի նահանգի միջև համագործակցության հնարավորությունները: Համաժողովին մասնակցում են պետական կառույցների, տարածքային և տեղական ինքնակառավարման մարմինների, տարբեր գերատեսչությունների, ոչ կառավարական կազմակերպությունների ներկայացուցիչներ և փորձագետներ: