երեքշաբթի, 17 նոյեմբերի 2015
Վարչապետն ընդունել է Եվրոպայի աթլետիկայի ֆեդերացիայի նախագահին և գործադիր տնօրենին
Վարչապետ Հովիկ Աբրահամյանն ընդունել է Եվրոպայի աթլետիկայի ֆեդերացիայի նախագահ Սվեն Առնե Հանսենին և գործադիր տնօրեն Քրիստիան Միլցին:
Վարչապետը կարևորել է պարոնայք Հանսենի և Միլցի այցը Հայաստան և վստահություն հայտնել, որ այն կնպաստի մեր երկրում աթլետիկայի զարգացմանն ու Հայաստանի աթլետիկայի ֆեդերացիայի հետ համագործակցության խորացմանը: Հովիկ Աբրահամյանը նշել է, որ ՀՀ կառավարությունն անում է ամեն ինչ սպորտի և, ընդհանրապես, հանրության շրջանում առողջ ապրելակեպի զարգացման համար: Վարչապետը շնորհակալություն է հայտնել Եվրոպայի աթլետիկայի միջազգային ֆեդերացիային՝ Երևանի «Հրազդան» մարզադաշտում սինթետիկ ծածկույթով վազքուղիների կառուցմանն աջակցելու համար:
Եվրոպայի աթլետիկայի ֆեդերացիայի նախագահը և գործադիր տնօրենը նշել են, որ պատրաստ են հետագայում ևս աջակցել ՀՀ աթլետիկայի ֆեդերացիային՝ ՀՀ-ում մարզաձևի հետագա զարգացմանը նոր թափ հաղորդելու նպատակով: Նրանց խոսքով՝ Երևանում սինթետիկ ծածկույթով վազքուղիների առկայությունը թույլ կտա առաջիկա տարիներին այստեղ կազմակերպել ու անցկացնել բազմաթիվ խոշորամասշտաբ միջազգային մրցումներ:
Այնուհետև վարչապետ Հովիկ Աբրահամյանի ներկայությամբ ստորագրվել է Երևան քաղաքի «Հրազդան» մարզադաշտի վերանորոգման փոխըմբռնման հուշագիր, որի շրջանակում էլ կիրականացվի «Հրազդան» մարզադաշտում սինթետիկ ծածկույթով վազքուղիների կառուցման ծրագիրը:
