ուրբաթ, 5 փետրվարի 2016
ՀՀ վարչապետ Հովիկ Աբրահամյանի շնորհավորական ուղերձը Սահմանադրական դատարանի ստեղծման 20-ամյակի առթիվ
Սահմանադրական դատարանի մեծարգո՛ նախագահ,
Հայաստանի Հանրապետության կառավարության և անձամբ իմ անունից շնորհավորում եմ Ձեզ, Սահմանադրական դատարանի բոլոր անդամներին և ողջ աշխատակազմին՝ Սահմանադրական դատարանի ստեղծման 20-ամյակի կապակցությամբ:
Անգնահատելի է Սահմանադրական դատարանի դերը մեր երկրի արդարադատության կայացման և զարագացման գործում: Այս ինստիտուտը կարևորագույն նշանակություն ունի սահմանադրությամբ հաստատված ժողովրդավարության, պետական կարգի, մարդու իրավունքների և ազատությունների պաշտպանության գործընթացներում: Սահմանադրական դատարանն անցած երկու տասնամյակի ընթացքում իր գործունեությամբ կարողացել է արժանանալ ՀՀ քաղաքացու վստահությանը՝ իր աշխատանքը ծառայեցնելով բացառապես ի շահ Հայաստանի Հանրապետության սահմանադրական կարգի ու սահմանադրական արդարադատության պահպանման: Համոզված եմ, որ գալիք տարիների ընթացքում ևս այս կարևորագույն ինստիտուտը շարունակելու է լավագույնս կյանքի կոչել Սահմանադրությամբ ամրագրված իր լիազորությունները՝ նպաստելով Հայաստանի Հանրապետությունում արդարադատության, ժողովրդավարության, քաղաքացու իրավունքների պաշտպանության հետագա զարգացմանը:
Կրկին շնորհավորելով Սահմանադրական դատարանի ստեղծման 20-րդ տարեդարձի առթիվ՝ մաղթում եմ նորանոր հաջողություններ և բեղմնավոր գործունեություն:
