երկուշաբթի, 26 ապրիլի 2004
Այսօր ՀՀ վարչապետ Անդրանիկ Մարգարյանը մեկնել է Վայոց Ձորի մարզ` մասնակցելու «Հիդրոտեխնիկական կառուցվածքներ Որոտան գետի վրա» օբյեկտի հանդիսավոր բացման արարողությանը: Ջրատարի կառուցումն սկսվել է դեռևս 1981 թվականին` «Որոտան-Արփա» թունելի շինարարությամբ: Այն իրենից ներկայացնում է Որոտան գետի հոսքը Արփա գետի ավազան տեղափոխող հիդրոտեխնիկական կառույցների համալիր։ Թունելի երկարությունը 21.6կմ է, որով նախատեսվում է Սպանդարյանի ջրամբարից տարեկան 165մլն.մ3 ջուր տեղափոխել Կեչուտի ջրամբար, հետագայում Արփա-Սևան 48.3կմ երկարության թունելով դեպի Սևանա լիճ՝ ջրի մակարդակը բարձրացնելու, էկոլոգիական ռեժիմը վերականգնելու նպատակով։ Թունելի ուղեգիծն անցնում է Սիսիանի և Վայքի տարածաշրջանների ընդերքով։ Շինարարության աշխատանքները բարձր տեմպերով կատարվել են մինչև 1986թ., 1992թ. դրանք դադարեցվել են ֆինանսավորման բացակայության պատճառով։ 1997 թվականին շինարարական աշխատանքները վերսկսվեցին և հասան մեծ ծավալների։ Վերջին չորս տարիների ընթացքում շինարարությունում աշխատել է ամսական ավելի քան 500 մարդ։ Ջրատարի շինարարական աշխատանքներն ավարտված են և ՀՀ կառավարության 2003թ. հուլիսի 10-ի N 865-Ա որոշմամբ «Հիդրոտեխնիկական կառուցվածքներ Որոտան գետի վրա» օբյեկտը շահագործման ընդունող կառավարական հանձնաժողովն ու նրան կից ստեղծված աշխատանքային հանձնախումբը տվել են իրենց դրական եզրակացությունը օբյեկտը շահագործման հանձնելու վերաբերյալ:
Ջրատար թունելի բացման արարողության ժամանակ շինարարության մի շարք մասնակիցներ կպարգևատրվեն ՀՀ մեդալներով և ՀՀ վարչապետի շնորհակալագրերով:
