չորեքշաբթի, 19 մայիսի 2004
ՀՀ վարչապետ Անդրանիկ Մարգարյանն այսօր ընդունել է Հայաստանում Սիրիայի Արաբական Հանրապետության գործերի ժամանակավոր հավատարմատար Ղասսան Ռասլանին:
Գոհունակություն հայտնելով հայ-սիրիական հարաբերությունների ներկա մակարդակից, կողմերը նշել են, մասնավորապես, երկու պետությունների միջև իրավապայմանագրիային դաշտի ընդլայնման անհրաժեշտությունը: Ընդգծելով արդեն գործող մի շարք համաձայնագրերի շրջանակներում գյուղատնտեսության, կրթության, գիտության ու մշակույթի ոլորտներում հաջողությամբ զարգացող համագործակցությունը, նրանք վստահություն են հայտնել, որ ներկայումս քննարկման փուլում գտնվող պայմանագրերի ստորագրումից հետո, փոխշահավետ գործակցությունը նույն հաջողությամբ կզարգանա նաև կապի ու հեռահաղորդակցության, հարկային, մաքսային, առողջապահության բնագավառներում: Այդ տեսակետից կողմերը կարևորել են այս տարվա ամռանը Երևանում կայանալիք հայ-սիրիական միջկառավարական հանձնաժողովի երրորդ նիստի անցկացումը, որը, ըստ նրանց, նոր խթան կհանդիսանա երկկողմ գործնական հարաբերությունների զարգացման համար: Միաժամանակ, Անդրանիկ Մարգարյանը և Ղասսան Ռասլանը մտահոգություն են արտահայտել երկու երկրների միջև առևտրաշրջանառության փոքր ծավալների կապակցությամբ: Ցուցանիշների բարելավմանն ուղղված քայլերի թվում նրանք նշել են Հայաստանի և Սիրիայի գործարար շրջանակների միջև շփումների ակտիվացումը, համատեղ ձեռնարկությունների ստեղծումը:
Հանդիպման ավարտին պարոն Ղասսան Ռասլանը Անդրանիկ Մարգարյանին է փոխանցել Սիրիայի ազգային տոնի 58-րդ տարելիցի կապակցությամբ իր երկրի վարչապետ Մուհամմադ Նաջի Ատրիին ՀՀ վարչապետի հղած շնորհավորական ուղերձի պատասխան նամակը: Նամակում Սիրիայի վարչապետը հարատև զարգացում է մաղթել երկու երկրների միջև գոյություն ունեցող համագործակցությանը և բարգավաճում՝ բարեկամ հայ ժողովրդին:
