երեքշաբթի, 25 մայիսի 2004
ՀՀ վարչապետ Անդրանիկ Մարգարյանի շնորհավորական ուղերձը վերջին զանգի առթիվ
Սիրելի շրջանավարտներ,
Շնորհավորում եմ բոլորիդ այս գեղեցիկ և հիշարժան օրվա՝ դպրոցական ուսումնառությունն ավարտելու կապակցությամբ: Այսօր կրթօջախներում հնչող վերջին զանգը մեծ խորհուրդ ունի, այն ավետում է ձեր մուտքը դեպի մեծ կյանք, դեպի ինքնադրսևորման, գործունեության նոր ասպարեզներ: Վստահ եմ, որ դպրոցական տարիներին ստացած գիտելիքներով հարստացած ձեր ունակություններն ու կարողությունները, իբրև մեր պետության արժանի քաղաքացիներ, ի սպաս կդնեք երկրի տնտեսության ամենատարբեր ոլորտներում` նպաստելով պետականության հիմքերի ամրապնդմանն ու հզորացմանը:
Հավատում եմ, որ դուք՝ կյանք մտնելով իբրև առավել ազատ, անկաշկանդ մտածողությամբ, նաև մեր նորօրյա պատմության հերոսական դրվագների ոգով կրթված ու դաստիարակված սերունդ, լիովին կարդարացնեք ձեր ծնողների և ուսուցիչների ակնկալիքները:
Բարի երթ եմ մաղթում ձեզ` ձեր ինքնուրույն կյանքում և հաջողություններ ձեր բոլոր ձեռնարկումներին:
