երկուշաբթի, 31 մայիսի 2004
Այսօր տեղի է ունեցել ՀՀ կառավարության բարեգործական ծրագրերի համակարգման հանձնաժողովի հերթական նիստը, որը վարել է հանձնաժողովի նախագահ Վ. Մովսիսյանը:
Հանձնաժողովը քննարկել է 8 բարեգործական ծրագիր: Մասնավորապես, քննարկվել և հաստատվել են` «Օրրան» բարեգործական-հասարակական կազմակերպության 2004թ. ընթացքում իրականացվող ծրագիրը, որի նպատակն է օգնության ձեռք մեկնել փողոցում հայտնված երեխաներին, աջակցել աղքատության մեջ գտնվող ընտանիքներին, միայնակ և կարիքավոր ծերերին: Հաստատվել են նաև «Վորլդ վիժն ինթերնեյշնլ» միջազգային բարեգործական կազմակերպության հայաստանյան մասնաճյուղի կողմից իրականացվող Կապանի, Տավուշի և Գյումրու տարածաշրջանների զարգացման, ինչպես նաև Մոր և մանկան առողջության ու սնուցման ծրագրերը, Մայր Աթոռ Սուրբ Էջմիածնի ֆինանսավորմամբ ՀՀ գիտությունների ազգային ակադեմիայի լեզվի և տնտեսագիտության ինստիտուտի տարածքի վերանորոգման ծրագիրը, Հայաստանի հրեական կրոնական համայնքի կողմից իրականացվող ծրագիրը, որի նպատակն է նյութապես օգնել Հայաստանի տարածքում ապրող հրեաներին, սոցիալապես անապահով ու բազմազավակ ընտանիքներին, միայնակ և ծեր թոշակառուներին:
Նիստում քննարկվել և հավանության են արժանացել նաև տարբեր կազմակերպությունների հասցեներով ուղարկված բեռների ներմուծման ծրագրեր, ինչպես և նախկինում հաստատված ծրագրերի շրջանակներում իրականացվող հարակից գործարքներ և այլ հարցեր։
