հինգշաբթի, 3 հունիսի 2004
Այսօր ՀՀ վարչապետ Անդրանիկ Մարգարյանն ընդունել է Արժույթի միջազգային հիմնադրամի (ԱՄՀ) Երևանյան գրասենյակի ղեկավար Ջեյմս Մաքհյուին, որը վարչապետին տեղեկացրել է Վաշինգտոնում օրերս կայացած ԱՄՀ-ի տնօրենների խորհրդի հանդիպման մասին և քննարկել հիմնադրամի ու ՀՀ կառավարության հետագա համագործակցությանը վերաբերող հարցեր. «Ուրախ եմ տեղեկացնելու, որ հիմնադրամի տնօրենների խորհրդում աճող վստահություն կա Հայաստանի նկատմամբ: ԱՄՀ ղեկավար մարմինը համարում է, որ ձեր երկրում տնտեսական առաջընթացը լավ է ընթանում»,- նշել է պարոն Մաքհյուն ՀՀ վարչապետի հետ հանդիպման ընթացքում:
Ս.թ. հունիսին, ըստ Արժույթի միջազգային հիմնադրամի Երևանյան գրասենյակի ղեկավար Ջեյմս Մաքհյուի, ավարտվում է հիմնադրամի ծրագիրը Հայաստանում, և դրա շրջանակներում կատարված աշխատանքը սեպտեմբերին ամփոփելուց ու դրական արդյունք արձանագրելուց հետո, կքննարկվի հաջորդ ծրագրի նախապատրաստման հարցը: Ջեյմս Մաքհյուն նշել է, թե անցյալ տարիների փորձից ելնելով, վստահ են, որ ավարտվող ծրագիրը ևս արդյունավետ կգնահատվի:
Հանդիպման ժամանակ քննարկվել են Հայաստանի տնտեսական զարգացումներին, արձանագրված հաջողություններին և առկա խնդիրներին ու դրանց հնարավոր լուծումներին վերաբերող հարցեր:
