երկուշաբթի, 21 հունիսի 2004
ՀՀ վարչապետ Անդրանիկ Մարգարյանը, որը նաև «Հազարամյակի մարտահրավեր» հիմնադրամի ծրագրի խորհրդի նախագահն է, այսօր հրավիրել է խորհրդակցություն՝ շահագրգիռ նախարարությունների, գերատեսչությունների և հանրապետության մարզպետների մասնակցությամբ: Քննարկվել են ԱՄՆ կառավարության «Հազարամյակի մարտահրավեր» ծրագրում ընդգրկված մեր երկրի կողմից ծրագրային առաջարկության ձևավորման ընթացքին վերաբերող խնդիրներ:
Ծրագրի ձևավորման համար կարևորելով հասարակական լայն քննարկումները, հանրության հետ խորհրդակցելով՝ նրա տեսակետները, առաջարկները կառավարությանը ներկայացնելու անհրաժեշտությունը, վարչապետը հանրապետության մարզպետներին, իբրև տեղերում կառավարության ներկայացուցիչների, հանձնարարել է ակտիվ ներգրավվել մարզերում հասարակական քննարկումներ կազմակերպելու աշխատանքին՝ այդ ամենն իրականացնելով հրապարակային, հանրապետական և տեղի զանգվածային լրատվամիջոցների մասնակցությամբ: ՀՀ նախագահի գլխավոր խորհրդական, «Հազարամյակի մարտահրավեր» հիմնադրամի ծրագրի խորհրդի նախագահի տեղակալ Վահրամ Ներսիսյանցը և ֆինանսների և էկոնոմիկայի նախարար Վարդան Խաչատրյանը խորհրդակցության մասնակիցներին ներկայացրել են «Հազարամյակի մարտահրավեր» ծրագրի նպատակները, գերակայությունները, հայաստանյան ծրագրի վերաբերյալ ՀՀ կառավարության մոտեցումները, առաջնահերթությունները, որոնք ամրագրված են նաև Աղքատության հաղթահարման ռազմավարական երկարաժամկետ ծրագրում:
Քննարկումների արդյունքում ակնկալվող առաջարկությունները, ըստ ֆինանսների և էկոնոմիկայի նախարարի, պետք է նկատի առնեն այն հանգամանքը, որ ամերիկյան կառավարության տրամադրելիք ֆինանսական միջոցները օգտագործվելու են իբրև ուղիղ ներդրում տնտեսության մեջ և ներդրում մարդկային կապիտալում՝ արդյունքում նպատակ ունենալով նպաստել տնտեսական շարունակական, կայուն աճին և աղքատության կրճատմանը:
