չորեքշաբթի, 23 հունիսի 2004
Այսօր կառավարությունում, ՀՀ տարածքային կառավարման և ենթակառուցվածքների գործունեությունը համակարգող նախարար Հովիկ Աբրահամյանը, որը նաև 1988-1992թթ. Ադրբեջանից բռնագաղթած անձանց բնակարանային ապահովության առաջնահերթ ծրագրի իրականացման աշխատանքները համակարգող միջգերատեսչական հանձնաժողովի նախագահն է, հրավիրել է հանձնաժողովի առաջին նիստը: Նիստին՝ դիտորդի կարգավիճակով, հրավիրվել են նաև ՄԱԿ-ի զարգացման ծրագրերի, ՄԱԿ-ի փախստականների գերագույն հանձնակատարի, Փախստականների նորվեգական խորհրդի, ԱՄՆ-ի միջազգային գործակալության, Համաշխարհային բանկի հայաստանյան գրասենյակների և միջազգային մի շարք այլ դոնոր կազմակերպությունների ներկայացուցիչներ:
Նախարար Հովիկ Աբրահամյանը նախ նիստի մասնակիցներին է ներկայացրել ՀՀ կառավարության 2004թ. մայիսի 20-ի «1988-1992թթ. Ադրբեջանից բռնագաղթած անձանց բնակարանային ապահովության առաջնահերթ ծրագրի մասին» թիվ 747 որոշումը: Նա նշել է, որ չնայած նախորդ տարիներին ձեռնարկված միջոցառումներին, Ադրբեջանից բռնագաղթածները շարունակում են մնալ հասարակության ամենաանապահով շերտերից մեկը և պատահական չէ նրանց ընդգրկումը Աղքատության նվազեցման ռազմավարական ծրագրում: Աշխատանքներն այդ ուղղությամբ շարունակվում են և 2004թ. մայիսի 20-ի որոշմամբ կառավարությունը հաստատել է 3470 առավել կարիքավոր փախստական ընտանիքների բնակարանային ապահովության ծրագիրը: Վերջինիս արժեքը, ըստ հանձնաժողովի նախագահի, կազմում է ավելի քան 16,2 մլն ԱՄՆ դոլար, որից 5 մլն-ը, 2005-2007թթ. միջինժամկետ ծախսերի ծրագրի համաձայն, ներդրվելու է ՀՀ կառավարության կողմից, իսկ ծրագրի արժեքի մնացած մասի ապահովման համար հանձնաժողովն ակնկալում է միջազգային դոնոր կազմակերպությունների աջակցությունը:
Նիստում հանձնաժողովի անդամներին հանձնարարվել է 20-օրյա ժամկետում բանակցել հնարավոր դոնոր կազմակերպությունների ներկայացուցիչների հետ և ստացված առաջարկությունները, ամփոփելուց հետո, ներկայացնել հանձնաժողովի քննարկմանը:
