երկուշաբթի, 28 հունիսի 2004
ՀՀ վարչապետ Անդրանիկ Մարգարյանի ողջույնի խոսքը գրողների համահայկական երկրորդ համաժողովի մասնակիցներին
Համաժողովի հարգելի մասնակիցներ և հյուրեր,
Ողջունում եմ գրողների համահայկական երկրորդ համաժողովի անցկացումը Երևանում, որն այս տարի համընկնում է Հայաստանի գրողների միության հիմնադրման 70-ամյակի հետ: Մեր ազգի պատմական ճակատագրի արտացոլումը լինելով, հայ մշակույթն ու գրականությունը ևս դարեր շարունակ բաժանված են եղել արևմտահայ, արևելահայ, Հայոց մեծ եղեռնից հետո էլ՝ սփյուռքահայ հատվածների: Սակայն երբեք չի մարել արհեստական այդ անջրպետները վերացնելու, ժողովրդի հոգևոր-մշակութային միասնականությունը վերականգնելու ձգտումը: Այսօր, երբ արդեն ավելի քան մեկ տասնամյակ հայոց անկախ պետականությունն իրականություն է, երբ տարեցտարի մեծ ջանքեր են գործադրվում այն ամրապնդելու և հզորացնելու, համազգային այդ երազանքի իրագործումն առավել իրատեսական է դառնում: Երկրի տնտեսական առաջընթացը, ժողովրդի սոցիալական, կենցաղային հիմնախնդիրների աստիճանական լուծմանն ուղղված պետական ռազմավարական ու միջնաժամկետ ծրագրերի իրագործումը, լուրջ հնարավորություններ են ստեղծում միաժամանակ ուշադրությունը սևեռելու հոգևոր-մշակութային ոլորտին: Կարծում եմ, վերջին տարիներին այս միտումը բավականաչափ զգալի է: Այդ նպատակով առաջիկայում նախատեսվում է «Մեկ ազգ, մեկ մշակույթ» համազգային փառատոնի անցկացումը Երևանում: Վստահ եմ, որ համահայկական գրական այս համաժողովը ևս իր զգալի ներդրումը կունենա մեր հոգևոր-մշակութային արժեքների միասնության ամրապնդման գործում, իբրև համամարդկային արժեք, քանի որ ինչպես նշում է մեծ արվեստագետը` մշակույթները, եթե համամարդկային չեն, մշակույթ չեն, և չեն կարող և չպետք է ճամփորդեն հայրենիքների և ժամանակների միջով, քանի որ արվեստը ժամանակավորից պատմություն է պահանջում և հավերժականից ներկայություն, համամարդկայինից ստույգ հայեցիություն է պահանջում և հայեցիից համամարդկայնություն:
Հաջողություն եմ մաղթում համաժողովին, ստեղծագործական արդյունավետ աշխատանք՝ ի նպաստ հայրենի պետության և սփյուռքի կապերի սերտացման, համազգային իղձերի իրականացման:
