ուրբաթ, 30 հուլիսի 2004
Այսօր ՀՀ կառավարությունում Համաշխարհային բանկի և ՀՀ կառավարության միջև ստորագրվել են համաձայնագրեր՝ մեր երկրի պետական հատվածի, առողջապահական համակարգի արդիականացման, սոցիալական պաշտպանության և կառավարման ծրագրերի վերաբերյալ: Համաձայնագրերը ստորագրել են ՀԲ Հայաստանյան գրասենյակի ղեկավար Ռոջեր Ռոբինսոնը, ՀՀ կառավարության աշխատակազմի ղեկավար-նախարար Մանուկ Թոփուզյանը և ՀՀ ֆինանսների և էկոնոմիկայի նախարար Վարդան Խաչատրյանը:
Պետական հատվածի արդիականացման ծրագրի համար նախատեսված միջազգային զարգացման ընկերակցության՝ 10,15 մլն ԱՄՆ դոլար արժողությամբ վարկն ուղղվելու է Հայաստանի պետական հատվածի արդիականացման, կառավարման թափանցիկության, արդյունավետության և նպատակայնության բարելավման՝ կառավարության ջանքերին: ՀԲ-ի օժանդակած այս առաջին ծրագիրն աջակցելու է նաև քաղաքացիական ծառայության համակարգի բարեփոխումներին:
Երկրորդ համաձայնագիրը առողջապահական համակարգի արդիականացման ծրագրի վերաբերյալ, մեր երկրի առողջապահության ոլորտում լայնածավալ կառուցվածքային բարեփոխումներին օժանդակող ՀԲ-ի յոթնամյա, երկու մասից բաղկացած ծրագրի առաջին փուլն է: Միջազգային զարգացման ընկերակցության տրամադրած 19 մլն ԱՄՆ դոլար արժողությամբ վարկը և 1 մլն 250 հազար ԱՄՆ դոլար արժողությամբ դրամաշնորհն ուղղվելու են , մասնավորապես, բնակչության ամենախոցելի խմբերին ավելի մատչելի, արդյունավետ և կայուն առողջապահական ծառայությունների մատուցմանը:
Միջազգային զարգացման ընկերակցության հաջորդ՝ 5,15 մլն ԱՄՆ դոլար արժողությամբ վարկը նպատակ ունի օժանդակելու սոցիալական պաշտպանվածության կառավարման արդիականացման, մասնավորապես, բնակչության աղքատ և խոցելի խմբերի սոցիալական պաշտպանության ամրապնդման Հայաստանի կառավարության ջանքերին:
Համաձայնագրերի ստորագրումից հետո տեղի է ունեցել ՀԲ Հայաստանյան գրասենյակի ղեկավար Ռոջեր Ռոբինսոնի և ՀՀ կառավարության անդամների մամուլի ասուլիսը:
