ուրբաթ, 3 սեպտեմբերի 2004
Այսօր տեղի է ունեցել ՀՀ կառավարության բարեգործական ծրագրերի համակարգման հանձնաժողովի հերթական նիստը, որը վարել է հանձնաժողովի նախագահ Վ. Մովսիսյանը:
Հանձնաժողովը քննարկել է 5 բարեգործական ծրագիր: Մասնավորապես քննարկվել է և հաստատվել է՝
Միավորված ազգերի կազմակերպության փախստականների հարցերով գերագույն հանձնակատարի հայաստանյան գրասենյակի կողմից իրականացվող ծրագիրը, որի նպատակը տեսողության և լսողության մասնագիտական զննումն ու օպտիկական ակնոցների և լսողական սարքերի անհատույց բաշխումն է:
«Հայաստան» համահայկական հիմնադրամի կողմից իրականացվող Գյումրու N 29 ուսումնական մասնաշենքի կառուցման և Արագածոտնի մարզի Արեգ գյուղի դպրոցի մասնակի վերանորոգման աշխատանքների ծրագրերը:
Ֆրանսիայի «Բժշկական օգնություն և զարգացում» հասարակական կազմակերպության կողմից 2004-2005 թվականներին իրականացվող ծրագիրը, որով նախատեսվում է բարելավել ծննդաբերության համար նախատեսված պայմանները, ինչպես նաև նորածինների խնամքը Վարդենիս քաղաքում և շրջակա գյուղերում:
Նիստում քննարկվել և հաստատվել են նաև ԱՄՆ-ից «Հայ օգնության միություն» հասարակական կազմակերպության Հայաստանի մասնաճյուղի, «Գուրգեն Մելիքյանի` Քաշաթաղի բազմազավակ ընտանիքների» հիմնադրամի, Հայաստանի Հանրապետությունում Լեռնային Ղարաբաղի Հանրապետության մշտական ներկայացուչության և այլ կազմակերպությունների հասցեներով ուղարկված բեռների ներմուծման ծրագրեր, ինչպես նաև «Շեն» բարեգործական հասարակական կազմակերպության և «Դիակոնիա» բարեգործական հիմնադրամի՝ նախկինում հաստատված ծրագրերի շրջանակներում իրականացվող հարակից գործարքներ ու այլ հարցեր։
