չորեքշաբթի, 8 սեպտեմբերի 2004
ՀՀ վարչապետ Անդրանիկ Մարգարյանն այսօր ընդունել է Արժույթի միջազգային հիմնադրամի (ԱՄՀ) առաքելության ղեկավար Էնրիկե Գելբարդին, առաքելության անդամներ Սյուզան Ջորջին և Հայաստանում ԱՄՀ-ի մշտական ներկայացուցիչ Ջեյմս Մաքհյուին:
ԱՄՀ առաքելության ղեկավարը բավականին արդյունավետ համարելով Հայաստանի կառավարության հետ հիմնադրամի՝ շուրջ 10-ամյա համագործակցությունը, նշել է, որ իր հերթական այցի նպատակն է շարունակել երկխոսությունը և գործադիր իշխանության հետ քննարկել իրենց հետաքրքրող ֆինանսատնտեսական մի շարք հարցեր: Դրանց թվում ԱՄՀ ներկայացուցիչներն անդրադարձել են մեր երկրում գործարարության և հատկապես՝ փոքր ու միջին ձեռնարկատիրության աջակցման, գործարար-պետական կառույցներ հարաբերություններին, համապատասխան պետական կառույցների միջև համագործակցության ընդլայնման և փոխանակվող տեղեկատվության ծավալների մեծացման անհրաժեշտության մասին, որոնց վերաբերյալ ՀՀ վարչապետը ներկայացրել է իր մոտեցումները, այդ ուղղությամբ մինչ այժմ ձեռնարկված քայլերն ու դեռևս առկա խնդիրները: Հանդիպման ավարտին վարչապետը հույս է հայտնել, որ ԱՄՀ-ի հետ շահագրգիռ քննարկումների և ակտիվ փոխգործակցության շնորհիվ, արդյունավետ լուծումներ կգտնվեն նաև այդ խնդիրների համար:
