երկուշաբթի, 13 սեպտեմբերի 2004
ՀՀ վարչապետ Անդրանիկ Մարգարյանն այսօր ընդունել է մեր երկրում Ֆինլանդիայի արտակարգ և լիազոր դեսպան տիկին Տերհի Հակալային: Վարչապետը շնորհավորել է նորանշանակ դեսպանին և ՀՀ կառավարության ու իր անունից աջակցության պատրաստակամություն հայտնել: Ընդգծելով, որ հայ-ֆիննական տնտեսական համագործակցությունը զգալիորեն զիջում է քաղաքական համագործակցությանը, վարչապետը նշել է, որ Հայաստանը շահագրգռված է երկկողմ առևտրա-տնտեսական հարաբերությունների զարգացմամբ: Ըստ Անդրանիկ Մարգարյանի, այդ հարաբերություններն ընդլայնելու լայն հնարավորություններ կան և անհրաժեշտ է ակտիվացնել փոխգործակցությունը ինչպես պետական համապատասխան մարմինների, այնպես էլ գործարար շրջանակների միջև: Վարչապետը հույս է հայտնել, որ այդ ամենին կարող են նպաստել նաև բարձր մակարդակի փոխայցելությունները, որոնցից մեկն էլ առաջիկայում սպասվող Ֆինլադիայի արտգործնախարարի այցն է մեր երկիր:
Զրույցի ընթացքում երկուստեք կարևորվել է անհրաժեշտ իրավա-պայմանագրային դաշտի ստեղծումը, երկկողմ տնտեսական համաձայնագրերի ստորագրումը ևս: Դեսպան Տերհի Հակալայը հեռանկարային է համարել նաև Եվրոմիության «Ընդլայնված Եվրոպա. նոր հարևաններ» ծրագրի շրջանակներում ակտիվ համագործակցությունը:
