երկուշաբթի, 20 սեպտեմբերի 2004
ՀՀ վարչապետ Անդրանիկ Մարգարյանի ուղերձը Հայաստանի Հանրապետության Անկախության տոնի առթիվ
Սիրելի հայրենակիցներ,
Շնորհավորում եմ ձեզ Հայաստանի Անկախության տոնի առթիվ: Տասներեք տարի առաջ կատարելով իր պատմական ընտրությունը` մեր ժողովուրդն այնուհետ լծվեց անկախ, ժողովրդավարական պետության կերտման ու ամրապնդման նվիրական գործին: Դյուրին չի եղել այդ ճանապարհը: Նրա տարբեր հանգրվաններում հանդիպել են բազմաթիվ դժվարություններ, դրանք քիչ չեն նաև այսօր, բայց այդ ամենը հաղթահարելուն մեզ օգնել են սեփական երկրում ազատ ու ինքնիշխան ապրելու` մեր ժողովրդի անկոտրում կամքը, համազգային խնդիրների լուծման վճռորոշ պահերին ջանքերը միավորելու հայության ձգտումը: Այսօր էլ անհանգիստ օրեր ապրող աշխարհում քաղաքակիրթ մարդկությանը նոր մարտահրավերներ են նետված, որոնք սպառնում են ավելի սրել իրավիճակը աշխարհում, նոր հակամարտություններ հրահրել պետությունների ու ազգերի միջև: Անհանդուրժականություն դրսևորելով այդ երևույթների նկատմամբ և համագործակցելով շահագրգիռ այլ երկրների հետ` մենք, միաժամանակ, առավել ողջամիտ պետք է լինենք մեր նորանկախ պետությունը նման վտանգներից զերծ պահելու հարցում:
Վստահ եմ, որ Հայրենիքի, Արցախի և Սփյուռքի հայության համախմբմամբ այսուհետ ևս կկարողանանք դիմագրավել բոլոր փորձություններն ու մարտահրավերները: Հզորացնելով մեր պետությունը` մենք արժանին ենք մատուցում մեր ազգի այն հերոսներին, ովքեր իրենց անձնազոհությամբ ուղի հարթեցին Անկախության այս երթի համար:
