չորեքշաբթի, 22 սեպտեմբերի 2004
ՀՀ վարչապետ Անդրանիկ Մարգարյանն այսօր ընդունել է Հայաստանում ԱՄՆ նորանշանակ արտակարգ և լիազոր դեսպան Ջոն Մարշալ Էվանսին:
Շնորհավորելով դեսպանին մեր երկրում իր դիվանագիտական առաքելությունն սկսելու կապակցությամբ, վարչապետը հույս է հայտնել, որ նրա գործունեության շրջանում ևս հայ-ամերիկյան հարաբերությունները կշարունակեն հաջողությամբ զարգանալ: Նա ՀՀ կառավարության և իր անունից պատրաստակամություն է հայտնել հնարավորինս աջակցել դեսպանին՝ գործունեության ընթացքում: Խոսելով տարածաշրջանային խնդիրների մասին, կողմերը նշել են երկու երկրների շահագրգռությունը Հարավային Կովկասում խաղաղության, կայունության և բարեկեցության հաստատմամբ: Նրանք ընդգծել են այդ հարցում ԱՄՆ-ի հետ մեր երկրի քաղաքական ու տնտեսական հարաբերությունների հետագա ընդլայնման դերը, կարևորելով, մասնավորապես, Տնտեսական հարցերով հայ-ամերիկյան միջկառավարական աշխատանքային խմբի (USATF) գործունեությունը: Անդրանիկ Մարգարյանը նշել է, որ Հայաստանը ձգտում է ամրապնդել երկու երկրների հարաբերություններում արձանագրված դրական միտումները, մանավանդ որ, ըստ նրա այսօր առկա են համագործակցության նոր ասպարեզներ, որոնցից նա կարևորել է հատկապես մեր երկրի ընդգրկումը ԱՄՆ-ի «Հազարամյակի մարտահրավեր» ծրագրում: Նա տեղեկացրել է, որ «Հազարամյակի մարտահրավեր» հիմնադրամի հայաստանյան ծրագրի հոգաբարձուների խորհուրդը, որի նախագահը ՀՀ վարչապետն է՝ պետական մարմինների, գործարար շրջանակների և հասարակական կազմակերպությունների հետ, լայն քննարկումներ է իրականացրել ներկայացվելիք առաջարկների վերաբերյալ և արդեն սեպտեմբերի վերջին Հայաստանը կներկայացնի իր առաջարկները ամերիկյան կողմին:
Դեսպան Ջոն Էվանսը արդեն իսկ դրական է համարել, որ Հայաստանն ընդգրկվել է «Հազարամյակի մարտահրավեր» ծրագրում: Ըստ նրա, հայաստանյան առաջարկների հաստատումից հետո, համագործակցության նոր և լայն հնարավորություններ կբացվեն: Դեսպանն ընդգծել է, որ երկու կառավարությունների միջև լավ ավանդույթներ են ձևավորվել և հույս է հայտնել, որ դրանք առաջիկայում կշարունակվեն ու ավելի կխորացվեն:
