ուրբաթ, 24 սեպտեմբերի 2004
ՀՀ վարչապետ Անդրանիկ Մարգարյանն այսօր այցելել է Հայաստանի շախմատի ակադեմիա՝ շախմատի այս տարվա Եվրոպայի պատանեկան առաջնությունում ակադեմիայի սաների փայլուն մասնակցության կապակցությամբ:
Շնորհավորելով ակադեմիայի ղեկավարությանը, մարզիչներին և մեծ նվաճման հասած պատանի մարզիկներին տպավորիչ հաջողության համար, Անդրանիկ Մարգարյանը համակարգիչներ է նվիրել 10 տարեկանների տարիքային խմբում Եվրոպայի չեմպիոնի կոչումը նվաճած Ռոբերտ Աղասարյանին և նրա մարզչին, ինչպես նաև 12 տարեկանների մրցույթի արծաթե մեդալակիր Սամվել Տեր-Սահակյանին: Նա նշել է, որ այսուհետ նման նշանակալից հաղթանակների կապակցությամբ կպարգևատրվեն ինչպես առաջին տեղ գրաված մարզիկները, այնպես էլ նրանց մարզիչները: Վարչապետը ակադեմիայի սաներին հաջողություններ է մաղթել նաև առաջիկայում կայանալիք շախմատի պատանիների աշխարհի առաջնությունում:
Վարչապետի հետ միասին ակադեմիա է այցելել և մեծ նվաճման առթիվ նրա սաներին շնորհավորել ու հաջողություններ է մաղթել նաև ՀՀ պաշտպանության նախարար, Հայաստանի շախմատի ֆեդերացիայի նախագահ Սերժ Սարգսյանը:
Հայաստանի շախմատի ակադեմիայի նախագահ Սմբատ Լպուտյանը՝ ակադեմիայի ղեկավարության, մարզիչների ու մարզիկների անունից շնորհակալություն է հայտնել հանրապետությունում շախմատի զարգացմանը նման բարձր մակարդակով ցուցաբերվող ուշադրության և հոգատարության համար, հավաստիացնելով, որ առաջիկայում ևս այդպիսի վերաբերմունքը կտա սպասվող արդյունքները: Հայաստանի շախմատի ակադեմիայի կողմից Սմբատ Լպուտյանը նույնպես մրցանակներ է հանձնել Եվրոպայի պատանեկան առաջնության մրցանակակիր մարզիկներին ու նրանց մարզիչներին:
