երկուշաբթի, 4 հոկտեմբերի 2004
ՀՀ վարչապետ Անդրանիկ Մարգարյանն այսօր ընդունել է Համահայկական խաղերի համաշխարհային կոմիտեի անդամներին: Նշելով, որ համահայկական խնդիրները նաև պետական հոգածության խնդիրներ են, վարչապետը Հայաստան-սփյուռք կապերի սերտացման և համագործակցության ակտիվացման առումով կարևորել է արդեն ավանդույթ դարձած համահայկական խաղերի անցկացումը՝ այդ միջոցառումը համարելով փոխգործակցության կարևորագույն բաղկացուցիչ: Հանդիպման ընթացքում կոմիտեի փոխնախագահ Ռոլանդ Շառոյանը կառավարության ղեկավարին ներկայացրել է համահայկական խաղերի անցկացման հետ կապված առաջիկա ծրագրերը, կոմիտեի անդամների քննարկումների օրակարգը, որը, ըստ նրա, ներառել է առաջիկա 3-4 տարիների անելիքները:
Վարչապետը կառավարության աջակցությունն է հայտնել կոմիտեին, նշելով, որ անհրաժեշտ է աստիճանաբար ընդլայնել խաղերի աշխարհագրությունն ու մեծացնել մասնակից երկրների թիվը: Անդրանիկ Մարգարյանը պատասխանել է նաև կոմիտեի անդամներին հետաքրքրող հարցերին և հանդիպման ավարտին հաջողություններ մաղթել նրանց՝ հետագա գործունեության մեջ:
