շաբաթ, 9 հոկտեմբերի 2004
ՀՀ վարչապետ Անդրանիկ Մարգարյանի մոտ այսօր տեղի է ունեցել «Համահայկական երիտասարդական միջազգային կենտրոն» հիմնադրամի հոգաբարձուների խորհրդի նիստ: Հիմնադրամի գործադիր տնօրեն Արմեն Սինանյանը խորհրդի նախագահ՝ վարչապետ Անդրանիկ Մարգարյանին և խորհրդի անդամներին ներկայացրել է այս տարվա հուլիսի 24-29-ը տեղի ունեցած երիտասարդական երկրորդ համաժողովի ամփոփիչ զեկույցը, որտեղ հանգամանորեն ներկայացված են համաժողովի արդյունքները, այդ թվում՝ լիագումար նիստի, թեմատիկ և աշխատանքային խմբերի (սփյուռք և գլոբալիզացիոն գործընթացներ, մշակույթ և ազգային ինքնություն, երիտասարդությունը և արդի համազգային խնդիրները) զեկույցներն ու դրանց արձանագրությունները, նաև ոչ պաշտոնական քննարկումների մասին տեղեկատվություն, համաժողովի ծրագրերը, լուսաբանման հետ կապված աշխատանքները և այլ տեղեկություններ:
Նշվել է, որ առաջինի համեմատ՝ երկրորդ համաժողովն ընդլայնել էր մասնակցության աշխարհագրությունը, ներառելով ավելի մեծ թվով երկրների ներկայացուցիչների, ինչպես նաև բովանդակային առումով հարստացրել էր համաժողովը, որի արձագանքները բավականին դրական են:
Ամփոփվել են նաև համաժողովի մասնակիցների դիտողություններն ու առաջարկությունները, որոնք, ըստ գործադիր տնօրենի, նկատի կառնվեն հաջորդ համաժողովներում՝ տարեցտարի մեծացնելով միջոցառման արդյունավետությունը, նոր ծրագրեր և խնդիրներ դնելով համաժողովի առջև:
Վարչապետը շեշտել է հատկապես իրականացված աշխատանքի արդյունքների մասին համաժողովի մասնակիցներին հետագայում իրազեկելու անհրաժեշտությունը, միջոցառմանը մասնակցած այդ երիտասարդների ներուժը իրենց երկրներում համաժողովի նպատակներին ծառայեցնելու և հայ երիտասարդներին համախմբելու կարևորությունը:
Անդրանիկ Մարգարյանն առաջարկել է նաև հետագա ծրագրերը կազմելիս քննարկել սփյուռքի ոչ հայախոս երիտասարդներին ևս համահայկական երիտասարդական ծրագրերին մասնակից դարձնելու, ինտեգրացիայի խնդիրները:
Այսօրվա նիստում հիմնադրամի արտաքին կապերի բաժնի ղեկավար Ռուբեն Մարկոսյանն էլ հոգաբաձուների խորհրդին ներկայացրել է ս.թ. նոյեմբերի երկրորդ տասնօրյակում նախատեսվող մեկ այլ միջոցառման՝ «Երիտասարդական աշխատանքը հակամարտությունների տարածաշրջաններում. մարդու իրավունքներ, ժողովրդավարություն և մասնակցություն» խորագրով միջազգային ճանաչողական այցի մանրամասները: Դրան կմասնակցեն Հայաստանից և արտերկրից ժամանած երիտասարդական աշխատանքի 10-15 փորձագետներ, որոնք ներկայացված կլինեն տարբեր կազմակերպությունների կողմից: Այցի նպատակն է նպաստել Լեռնային Ղարաբաղի երիտասարդական քաղաքականության և երիտասարդական աշխատանքի զարգացմանը, աջակցել հակամարտությունների կամ ոչ վաղ անցյալում ռազմական գործողություններ ծավալված տարածաշրջաններում երիտասարդական մասնակցության և ակտիվության զարգացման գործընթացներին, հայտնաբերել հակամարտությունների կամ ռազմական գործողությունների հետևանքով առաջացած երիտասարդական քաղաքականության զարգացման խոչընդոտները և փնտրել դրանց վերացման արդյունավետ ուղիներ, նպաստել Լեռնային Ղարաբաղի և այլ հակամարտությունների տարածաշրջաններում բնակվող երիտասարդ մարդկանց մեկուսացման վերացմանը, միջազգային համագործակցության գործընթացներում նրանց ինտեգրմանը, զարգացնել և ամրապնդել հակամարտությունների տարածաշրջաններում մարդու իրավունքների, ժողովրդավարության և երիտասարդության մասնակցության մեխանիզմները, մշակել միջմշակութային երկխոսության և խաղաղ համակեցության զարգացման ուղիները էսկալացված հակամարտություն վերապրած երիտասարդության շրջանում:
«Համահայկական երիտասարդական միջազգային կենտրոն» հիմնադրամի հոգաբարձուների խորհուրդն անդրադարձել է նաև 2005թ. իրականացվելիք համահայկական երիտասարդական միջոցառումներին՝ իբրև համահայական միջոցառումների բաղկացուցիչ: Հանձնարարվել է հիմնադրամի գործադիր տնօրենին՝ մինչև ս.թ. նոյեմբերի 15-ը խորհրդին ներկայացնել այդ միջոցառումների ծրագիրը:
Նիստում ՀՀ վարչապետ Անդրանիկ Մարգարյանը նաև կարևորել է իրականացվող բոլոր ծրագրերի ֆինանսավորման հետ կապված խնդիրներն առավել թափանցիկ և հրապարակային դարձնելու հարցը՝ հետագայում անհարկի խոսակցություններից ու շահարկումներից զերծ մնալու նպատակով:
