ուրբաթ, 15 հոկտեմբերի 2004
ՀՀ վարչապետ Անդրանիկ Մարգարյանն այսօր ընդունել է Սահմանադրական արդարադատության հիմնահարցերով 9-րդ երևանյան միջազգային գիտաժողովի մասնակիցներին: Վարչապետը ողջունել է Եվրոպայի խորհրդի Վենետիկի հանձնաժողովի և ՀՀ Սահմանադրական դատարանի նախաձեռնությամբ ու ջանքերով անցկացվող ավանդական դարձած միջազգային գիտաժողովն ու հույս հայտնել, որ 2005թ. ՀՀ ՍԴ-ի 10-ամյակի առիթով ևս այս միջոցառման մասնակիցները կհյուրընկալվեն Հայաստանում: Կառավարության ղեկավարը կարևորել է միջազգային կազմակերպությունների և տարբեր երկրների սահմանադրական դատարանների ներկայացուցիչների մասնակցությամբ սահմանադրական հիմնահարցերի, այդ թվում՝ սահմանադրական արդարադատության համակարգի խնդիրների քննարկումն ու փորձի փոխանակումը:
Նշելով, որ մեր երկիրը ԵԽ-ին անդամակցելուց հետո, ակտիվ աշխատանք է տանում ստանձնած պարտավորություններն իրագործելու ուղղությամբ և սերտորեն համագործակցում է Վենետիկի հանձնաժողովի ու ԵԽ այլ կառույցների հետ, վարչապետը, այդ պարտավորությունների շարքում, կարևորել է սահմանադրական բարեփոխումների իրագործումը: Նա հույս է հայտնել, որ պետության համար անչափ կարևորվող ժողովրդավարության ամրապնդմանը, սոցիալական բարեկեցության ապահովմանը և մի շարք այլ խնդիրների լուծմանը միտված պարտավորությունները հնարավոր կլինի նախանշված ժամկետներում իրականացնել:
Հանդիպման ընթացքում, բացի եվրաինտեգրման գործընթացի մասին խոսելուց, Անդրանիկ Մարգարյանը, հյուրերի խնդրանքով, անդրադարձել է նաև մեր երկրի տնտեսության ներկայիս վիճակին, տնտեսական քաղաքականությանը, առաջնահերթություններին, գործադիր և օրենսդիր իշխանությունների համագործակցությանն ու տարածաշրջանային խնդիրներին նաև դրանց ազդեցությանը Հայաստանի տնտեսության վրա:
ՀՀ ՍԴ նախագահ Գագիկ Հարությունյանը կառավարության ղեկավարին ներկայացրել է գիտաժողովի աշախատանքի ընթացքը, քննարկված թեմաները և հետագա ծրագրերը:
Վարչապետին հյուրընկալված պատվիրակության անդամները վստահեցրել են, որ ԵԽ Վենետիկի հանձնաժողովը կշարունակի համագործակցել և մշտապես կսատարի Հայաստանի Հանրապետությանը՝ բարեփոխումների իրագործման հարցում: Նրանք հույս են հատնել, որ հակամարտությունները հնարավորինս շուտ կհանգուցալուծվեն և տարածաշրջանում կհաստատվի հարատև խաղաղություն:
