ուրբաթ, 6 ապրիլի 2001
Այսօր ՀՀ վարչապետ Անդրանիկ Մարգարյանն ընդունել է Վերակառուցման և զարգացման Եվրոպական բանկի Հայաստանի տնօրեն Յուրի Պոլունևին: Նա տեղեկացրել է ՀՀ վարչապետին, որ Հայաստանում է գտնվում աշխատանքային այցով՝ նպատակ ունենալով հանդիպել ՀՀ կառավարության, բանկային համակարգի, միջազգային կազմակերպությունների ներկայացուցիչների և գործարար համայնքի անդամների հետ ու քննարկել հետագա համագործակցությանն ուղղված հարցեր: Ըստ պրն Պոլունևի, արդեն իսկ քննարկում է ունեցել ՀՀ-ում բանկային համակարգի զարգացման հնարավորությունների շուրջ և կարծում է, որ Հայաստանում բանկային համակարգի ռազմավարության մշակման անհրաժեշտություն կա: Վարչապետ Անդրանիկ Մարգարյանը, նշելով, որ բավականաչափ տեղյակ է պրն Պոլունևի հանդիպումների և քննարկումների մասին, համաձայնեց Եվրոբանկի ներկայացուցչի կարծիքին՝ ընդգծելով, որ տնտեսության իրական հատվածի ֆինանսավորման և առաջընթացի համար զարգացած բանկային համակարգը պարզապես կարևորագույն նախապայման է: Վարչապետը հույս հայտնեց, որ ՎԶԵԲ-ի հետ համագործակցությունը ոչ միայն բանկային, այլ նաև տնտեսության տարբեր ոլորտներում, այդ թվում էներգետիկա, գյուղատնտեսություն, ձեռնարկատիրություն և այլն, կնպաստի մեր երկրի զարգացմանը: Անդրանիկ Մարգարյանը կարևորել է բանկի հետ փոխգործակցությունը նոր և ավելի գործնական ու արդյունավետ հարթություն տեղափոխելն ու ծրագրերի նկատմամբ հետևողական վերաբերմունքը:
Հանդիպմանը երկուստեք կարևորվել է նաև տարածաշրջանային ծրագրերին նախապատվություն տալու խնդիրը, ինչը կայունության և զարգացման հիմք կարող է դառնալ:
ՎԶԵԲ-ի Հայաստանիտնօրենը ողջունել է փոքր ու միջին ձեռնարկատիրության զարգացմանն ուղղված կառավարության քաղաքականությունը և վստահեցրել, որ բանկը հնարավորինս կաջակցի այդ ոլորտի զարգացմանը: Յուրի Պոլունևը ողջունելի է համարել նաև Հայաստանի մակրոտնտեսական զարգացման ուղղությամբ արձանագրված դրական տեղաշարժը, ինչի մասին, ըստ նրա, նույնպիսի դրական արձագանք ունեն միջազգային կազմակերպությունները: նա կարևոր է համարել Հայաստանի կառավարոթյան ակտիվ աշխատանքը գործարար միջավայրի բարելավման հարցում և վստահեցրել, որ բարեփոխումների ամբողջ ընթացքում Եվրոբանկը կլինի Հայաստանի կողքին, իբրև վստահելի գործընկեր:
