ուրբաթ, 29 հոկտեմբերի 2004
ՀՀ վարչապետ Անդրանիկ Մարգարյանն այսօր ընդունել Համաշխարհային բանկի տարածաշրջանային տնօրեն Դոնա Դաուսեթ Կոիրոլոյին և նրա գլխավորած պատվիրակությանը:
Զրույցի ընթացքում երկուստեք գոհունակություն է հայտնվել ՀՀ կառավարության և ՀԲ-ի միջև համագործակցությունից, որի ուղղակի ազդեցությունը ակնառու է տարեցտարի բարելավվող Հայաստանի տնտեսական ցուցանիշները դիտարկելիս:
Տիկին Դոնա Դաուսեթ Կոիրոլոն ընդգծել է, որ մեծ առաջընթաց կա ինչպես ՀԲ-ի առանձին ծրագրերի, այնպես էլ ԱՀՌԾ-ի իրականացման գործում: Նա տեղեկացրել է, որ ս.թ. նոյեմբերի 18-ին բանկի տնօրենների խորհրդի քննարկմանն է ներկայացվելու Հայաստանում աղքատության հաղթահարման աջակցման վարկային ծրագիրը և հույս է հայտնել, որ այս տարվա ընթացքում հնարավոր կլինի այդ ծրագրի շրջանակներում որոշակի հատկացումներ անել:
Ըստ ՀԲ ներկայացուցիչների, առանձին բնագավառներում բարեփոխումների հայաստանյան փորձը տպավորիչ և օրինակելի է: Այդ իսկ պատճառով, առաջիկայում այլ երկրների կառաջարկվի այցելել Հայաստան և ուսումնասիրել հաջողված փորձը:
Հանդիպման ընթացքում անդրադարձ է եղել էներգետիկայի, տրանսպորտի ենթակառուցվածքների զարգացման և այլ ոլորտներում իրագործվելիք ծրագրերին: Համաշխարհային բանկը, պատվիրակության անդամների հավաստմամբ, կարևորում է տարածաշրջանային համագործակցությունը, այդ թվում՝ որոշակի բնագավառներում Հայաստանի և Վրաստանի միջև փոխշահավետ ծրագրերի իրագործումը: Հայաստանի կառավարության ղեկավարը նշել է, որ մեր երկիրը միշտ հանդես է եկել տարածաշրջանի երկրների միջև ակտիվ տնտեսական համագործակցություն ծավալելու օգտին և շարունակում է մնալ այդ տեսակետին, ինչին, ցավոք, հարևան ոչ բոլոր երկրներն են կողմնակից: Այդուհանդերձ, ըստ վարչապետի, կան որոշակի ծրագրեր, որոնք ՀԲ-ի աջակցությամբ հնարավոր կլինի իրագործել և այդ մասին որոշակի համաձայնություններ ձեռք են բերվել Հայաստանի և Վրաստանի իշխանությունների միջև:
ՀԲ-ի ներկայացուցիչների հետ հանդիպմանը անդրադարձ է եղել նաև կոռուպցիայի դեմ պայքարի ծրագրի իրականացման, դրա շրջանակներում ստեղծված մոնիտորինգի խմբի աշխատանքներին:
