չորեքշաբթի, 3 նոյեմբերի 2004
Այսօր տեղի է ունեցել ՀՀ կառավարության արտահերթ նիստ, որը վարել է վարչապետ Անդրանիկ Մարգարյանը:
Գործադիրը լրացում և փոփոխություն է կատարել ՀՀ կառավարության 2003թ. հունվարի 16-ի «Հայաստանի Հանրապետությունում հեռախոսային ծառայությունների մատուցման գործունեության լիցենզավորման կարգը և լիցենզիայի ձևը հաստատելու մասին» N 87-Ն որոշման մեջ: Մասնավորապես, սահմանվել է, որ այսուհետ հեռախոսային ծառայությունների մատուցման գործունեության լիցենզիան տրվում է՝ նշելով հեռախոսային ծառայության մատուցման տեսակը: Մրցույթը, որպես կանոն, կազմակերպում է ՀՀ տրանսպորտի և կապի նախարարությունը: Բացառիկ դեպքերում կառավարությունը կարող է կազմավորել մրցութային հանձնաժողով, որն իր կողմից սահմանված կարգով ու պայմաններով անցկացնում է մրցույթ և մրցույթի արդյունքները ներկայացնում կառավարության հաստատմանը:
Կառավարության մեկ այլ որոշմամբ, 900 ՄՀց ռադիոհաճախականությունների տիրույթում շարժական կապի գլոբալ համակարգի (GSM) ծառայությունների մատուցման լիցենզիա տալու համար ստեղծվել է մրցութային հանձնաժողով՝ տրանսպորտի և կապի նախարար Անդրանիկ Մանուկյանի նախագահությամբ: Հանձնաժողովի կազմում ընդգրկված են տարածքային կառավարման և ենթակառուցվածքների գործունությունը համակարգող, արդարադատության, առևտրի և տնտեսական զարգացման, ֆինանսների և էկոնոմիկայի, պաշտպանության նախարարների տեղակալները, ՀՀ կառավարությանն առընթեր պետական գույքի կառավարման վարչության պետը: Մրցութային հանձնաժողովին հանձնարարվել է՝ անցկացնել մրցույթ և դրա արդյունքները ներկայացնել կառավարության հաստատմանը:
Նիստում գործադիրը հաստատել է նաև «Արմենտել ՀՁ» փակ բաժնետիրական ընկերության՝ Հայաստանի Հանրապետության տարածքում հեռահաղորդակցության բնագավառում գործունեություն ծավալելու վերաբերյալ թիվ 60 լիցենզիայի լրացված և վերահաստատված տարբերակը: 2004թ. նոյեմբերի 4-ից ուժը կորցրած է ճանաչվել ՀՀ կառավարության 1997թ. հունիսի 25-ի թիվ 218 որոշումը:
Մեկ այլ որոշմամբ, լիազորվել է ՀՀ արդարադատության նախարարին՝ 10-օրյա ժամկետում ՀՀ կառավարության անունից վերջնական բանակցել և ստորագրել հաշտության համաձայնագիր:
