չորեքշաբթի, 10 նոյեմբերի 2004
ՀՀ վարչապետ Անդրանիկ Մարգարյանն այսօր ընդունել է Ռուսաստանի Դաշնության «Զարուբեժստրոյ» բաց բաժնետիրական ընկերության գլխավոր տնօրեն Եվգենի Գուդզենչիկին:
Գոհունակությամբ ընդունելով Հայաստանում գործունեություն ծավալելու «Զարուբեժստրոյ» ընկերության գլխավոր տնօրենի առաջարկն ու պատրաստակամությունը, վարչապետը նշել է, որ ջրային տնտեսության, էներգետիկայի, գյուղատնտեսության և այլ ոլորտներում Հայաստանն ունի հեռանկարային ծրագրեր, որոնց իրականացման գործում պատրաստ է համագործակցել միջազգային ասպարեզում մեծ փորձ ունեցող նման ընկերության հետ:
Ներկայացնելով իր ղեկավարած ընկերության անցած ճանապարհն ու գործունեությունը, Եվգենի Գուդզենչիկը նշել է, որ «Զարուբեժստրոյ» ԲԲԸ-ն ավելի քան 40 տարի առաջատար դիրքեր է գրավում ջրային տնտեսության ասպարեզումշինարարության միջազգային շուկայում, մեծ մասշտաբի շինարարական աշխատանքներ է իրականացրել աշխարհի շուրջ 50 երկրներում: Ներկայումս, ըստ նրա, ընկերությունը մեծ ուշադրություն է դարձնում հատկապես ԱՊՀ անդամ պետությունների հետ փոխգործակցության զարգացմանը, որը նաև Հայաստան կատարած իր այցի հիմնական նպատակն է: Նա ընդգծել է, որ ընկերությունը շատ լուրջ նպատակներ ունի Հայաստանում հիմնավոր գործունեություն ծավալելու ուղղությամբ: Մասնավորապես, նախատեսում է ստեղծել բավական հզոր արտադրական բազա՝ ինչպես փոքր և միջին, այնպես էլ խոշոր կառույցների շինարարական աշխատանքներին մասնակցելու, իր գործունեությունը շարունակական դարձնելու համար: Եվգենի Գուդզենչիկը հավաստել է, որ լավատեսորեն է նայում մեր երկրի հետ համագործակցության հեռանկարին, քանի որ, ըստ նրա, Հայաստանում կան ջրային տնտեսության ոլորտի ինչպես ինժեներատեխնիկական, այնպես էլ բանվորական որակյալ կադրեր, նաև իրական, հեռանկարային ծրագրեր, մասնավորապես, հիդրոէներգետիկայի, ոռոգման և ջրային այլ համակարգերի շինարարության ասպարեզում:
Հանդիպման ավարտին վարչապետ Անդրանիկ Մարգարյանը մեկ անգամ ևս հավաստել է «Զարուբեժստրոյ» ընկերության հետ գործակցությունը զարգացնելու ՀՀ կառավարության պատրաստակամությունը, նշելով, որ այդ ուղղությամբ որոշակի քայլերի մասին կարելի է խոսել համագործակցության ծրագրերի հստակեցումից հետո:
