ուրբաթ, 19 նոյեմբերի 2004
ՀՀ վարչապետ Անդրանիկ Մարգարյանի նախագահությամբ այսօր տեղի է ունեցել 2005թ. մարտին Նյու-Յորքում կայանալիք ՄԱԿ-ի կանանց կարգավիճակի հանձնաժողովի 49-րդ նստաշրջանի մասնակցության նախապատրաստական աշխատանքների կազմակերպման միջգերատեսչական հանձնաժողովի նիստ:
Քննարկվել է 1995թ.-ից ի վեր կանանց հիմնահարցերի ոլորտում տեղի ունեցած զարգացումների ամփոփումը հանդիսացող «Պեկին 10» ազգային զեկույցի նախապատրաստմանն ուղղված աշխատանքների ընթացքը:
Հանձնաժողովի նախագահի տեղակալ, ՀՀ աշխատանքի և սոցիալական հարցերի նախարար Աղվան Վարդանյանը զեկուցել է, որ նշված ուղղությամբ աշխատանքներն առավել ակտիվ են ընթացել հատկապես 2000թ. կայացած «Պեկին 5»՝ «Կանայք 2000. գենդերային հավասարություն, զարգացում և խաղաղություն 21-րդ դարում» միջազգային համաժողովից հետո: Մասնավորապես, 2000թ. ՀՀ վարչապետին առընթեր ստեղծվել է կանանց հարցերի խորհուրդ, 2003-2004թթ. կառավարությունը հաստատել է «Երեխայի իրավունքների պաշտպանության 2004-2015թթ.», «Մարդկանց առքուվաճառքի դեմ պայքարի», «Հայաստանի Հանրապետությունում կանանց վիճակի բարելավման և հասարակության մեջ նրանց դերի բարձրացման 2004-2010թթ.» Ազգային ծրագրերը, սկսվել է «Կանանց քաղաքական մասնակցության մասին» ՄԱԿ-ի կոնվենցիայի վավերացման գործընթացը:
Քննարկումից հետո, ՀՀ վարչապետ, վերոհիշյալ հանձնաժողովի նախագահ Անդրանիկ Մարգարյանը հանձնարարել է մեկշաբաթյա ժամկետում՝ հաշվի առնելով նաև նիստում արված դիտողություններն ու առաջարկները, ներկայացնել ամփոփ տեղեկանք մինչև այժմ կատարված աշխատանքների վերաբերյալ՝ հետագա անելիքներն առավել հստակեցնելու նպատակով: Հանձնարարվել է նաև բոլոր շահագրգիռ նախարարներին, գերատեսչությունների ղեկավարներին, մարզպետներին և Երևանի քաղաքապետին՝ եռօրյա ժամկետում իրենց տեղակալների մակարդակով ներկայացնել կանանց հիմնահարցերի Ազգային ծրագրի իրականացման պատասխանատուներին: Մեկ այլ հանձնարարականի համաձայն կստեղծվի աշխատանքային խումբ՝ «Պեկին 10» զեկույցի նախապատրաստման համար:
