ուրբաթ, 19 նոյեմբերի 2004
ՀՀ վարչապետ Անդրանիկ Մարգարյանն այսօր ընդունել է Հայ օգնության ֆոնդի (ՀՕՖ) նորանշանակ գործադիր տնօրեն Գառնիկ Նանագուլյանին, ՀՕՖ-ի նախկին գործադիր տնօրեն Եզնիկ Բալյանին և Հայաստանի մասնաճյուղի տնօրեն Գրիգոր Թաթուլյանին:
Շնորհավորելով Գառնիկ Նանագուլյանին՝ ՀՕՖ-ի գործադիր տնօրենի պաշտոնում նշանակման կապակցությամբ, վարչապետը նշել է, որ Հայաստանում ֆոնդի գործունեության անցած 15 տարիների ընթացքում արդեն իսկ համագործակցության լավ ավանդույթներ են ձևավորվել ՀՀ կառավարության և Հայ օգնության ֆոնդի միջև և հավաստել է այսուհետ ևս փոխգործակցությունը շարունակելու Հայաստանի կառավարության պատրաստակամությունը:
ՀՕՖ-ի գործադիր տնօրենը ևս ընդգծել է, որ մինչ այժմ կազմակերպության կողմից Հայաստանում և ԼՂՀ-ում բազմաթիվ ծրագրեր են իրականացվել արդյունաբերության, գյուղատնտեսության, էներգետիկայի, շինարարության, առողջապահության, կրթության, մշակույթի և այլ ոլորտներում: Իր հերթին հավաստելով ՀՀ կառավարության հետ համագործակցությունը շարունակելու և զարգացնելու ՀՕՖ-ի պատրաստակամությունը, նա հայտնել է նաև ներկա փուլում հանրապետության մարզերի, հատկապես սահմանամերձ գյուղերի զարգացման ծրագրերի իրականացմանը մասնակցելու մտադրության մասին:
Ողջունելով մարզերում սոցիալական ծրագրեր իրականացնելու գաղափարը, Անդրանիկ Մարգարյանն ընդգծել է, որ նման ծրագրեր՝ հատկապես համայնքային ճանապարհների, դպրոցների, առողջապահական հաստատությունների վերանորոգման և շինարարության ուղղությամբ, նախատեսված են ինչպես Աղքատության հաղթահարման ռազմավարական ծրագրում, այնպես էլ ՀՀ կառավարության 2005-2007թթ. միջինժամկետ ծախսային ծրագրում և ԱԺ-ի քննարկմանը ներկայացված 2005թ. պետական բյուջեում, որը որոշակի սոցիալական ուղղվածություն ունի: Այս ամենը, ըստ վարչապետի, լայն ասպարեզ է բացում ՀՕՖ-ի հետ համագործակցությունը շարունակելու և խորացնելու համար:
