Հայաստանի Հանրապետության Կառավարություն

Այսօր տեղի է ունեցել ՀՀ կառավարության բարեգործական ծրագրերի համակարգման հանձնաժողովի հերթական նիստը, որը վարել է հանձնաժողովի նախագահ Վ. Մովսիսյանը:

Հանձնաժողովը քննարկել է 4 բարեգործական ծրագիր: Մասնավորապես, քննարկվել և հաստատվել են «Հայաստան» համահայկական հիմնադրամի կողմից իրականացվող Գյումրի քաղաքի թիվ 29 դպրոցի կահավորման համար աշակերտական կահույքի պատրաստման և հատկացման, թիվ 29 և 32 դպրոցների գազաֆիկացման նախագծերի պատրաստման աշխատանքների ծրագրերը, «Կամար» բարեսիրական հասարակական կազմակերպության կողմից իրականացվող ՀՀ Շիրակի մարզի Փոքր Սարիար գյուղի միջնակարգ դպրոցի ջեռուցման համակարգի անցկացման և ուսումնական մասնաշենքի վերանորոգման ծրագիրը և «Օգնություն Շիրակի մարզի հոգեկան առողջության կենտրոնին» ծրագրին հարակից գործարքը, որով նախատեսվում է սեղանների և մահճակալների ձեռք բերում և անհատույց հանձնում:

Նիստում հաստատվել են նաև «Առդա» բարեգործական հիմնադրամի կողմից իրականացվող Երևանի թիվ 181 մանկապարտեզի ջեռուցման և ջրամատակարարման ծրագիրը, ՀՀ կառավարության բարեգործական ծրագրերի համակարգման հանձնաժողովի 2003թ. օգոստոսի 8-ի N Մ-288-Ա որոշմամբ հաստատված «Գյումրիի բարեգործական կլինիկայի կառուցում» ծրագրին հարակից գործարքը:

«Վորլդ Վիժն Ինթերնեյշնլ» կազմակերպության 2004թ. հունիսի 18-ի N Մ-223-Ա որոշմամբ հաստատված ծրագրի հարակից գործարքով նախատեսվում է ձեռք բերել համակարգիչներ և հարակից սարքեր, բարեգործական ծրագրեր իրականացնելու համար:

Նիստում քննարկվել և հաստատվել են նաև նախկինում հաստատված ծրագրերի շրջանակներում իրականացվող հարակից գործարքներ և ՀՀ առողջապահության նախարարության, «Սուրբ Աստվածամայր» բժշկական կենտրոն» փակ բաժնետիրական ընկերության և Գերմանիայի Բեռլին քաղաքի կարմիր խաչի «Ֆյուր Արմենիեն» բարեգործական հիմնադրամի հասցեով ուղարկված բեռների ներմուծման ծրագրեր։