հինգշաբթի, 9 դեկտեմբերի 2004
Այսօր տեղի է ունեցել Հայոց ցեղասպանության 90-ամյակին նվիրված միջոցառումների կազմակերպման պետական հանձնաժողովի նիստ, որը վարել է հանձնաժողովի նախագահ՝ վարչապետ Անդրանիկ Մարգարյանը: Հանձնաժողովին ներկայացվել է նախորդ նիստի հանձնարարականների կատարման ընթացքը, որից հետո քննարկվել և ներկայացված առաջարկների հիման վրա հաստատվել է 2005 թվականին Հայոց ցեղասպանության 90-ամյակին նվիրված հիմնական միջոցառումների ծրագիրը՝ կատարման ժամկետների, վայրի և պատասխանատուների նշմամբ: Վարչապետը նշել է, որ միջոցառումների հիմքում պետք է ընկած լինի և առավելապես շեշտադրվի հայոց ոգու ուժի, վերհառնումի, պետականության վերականգնման իրողությունը, ինչպես նաև ցեղասպանությունների՝ իբրև մարդկության դեմ գործված ոճրագործության, ճանաչման, դատապարտման, այդպիսով նաև կանխարգելման անհրաժեշտությունը:
Ըստ ծրագրի, տարելիցին նախորդող օրերին՝ ապրիլի 21-ից 22-ը, ՀՀ գիտությունների ազգային ակադեմիայում տեղի կունենա Հայոց ցեղասպանությանը և մարդու իրավունքների պաշտպանությանը նվիրված միջազգային համաժողով՝ «21-րդ դարն առանց ցեղասպանությունների» նշանաբանով, իսկ մինչ այդ կհրավիրվի Հայոց ցեղասպանության 90-ամյակին նվիրված գիտաժողով:
Հաստատված ծրագրով, մայրաքաղաքից բացի, տարվա ընթացքում բազմաթիվ և բազմաբնույթ միջոցառումներ են նախատեսված հանրապետության մարզերում, ԼՂՀ-ում, սփյուռքի հայակական համայնքներում:
Հանձնաժողովի նիստում հաստատվել են նաև Երևանի քաղաքապետարանի ու Կենտրոն թաղապետարանի կողմից «Ծիծեռնակաբերդ» զբոսայգում և Մեծ եղեռնի զոհերի հուշահամալիրում տարելիցի կապակցությամբ կատարվող շինարարական և բարեկարգման աշխատանքների ցանկը, զանգվածային միջոցառումների սցենարներն ու նախահաշիվները:
