շաբաթ, 18 դեկտեմբերի 2004
ՀՀ վարչապետ Անդրանիկ Մարգարյանի ողջույնի ուղերձը Տիգրան Պետրոսյանի 75-ամյակին նվիրված միջազգային շախմատային ինտերնետ-մրցաշարի մասնակիցներին
Աշխարհի իններորդ չեմպիոն Տիգրան Պետրոսյանի 75-ամյակին նվիրված միջազգային շախմատային ինտերնետ-մրցաշարի հարգարժան մասնակիցներ, մրցավարներ, հյուրեր:
Շնորհավորում եմ բոլորիդ մրցաշարի բացման առթիվ: Սա, որքան ինձ հայտնի է, նման բարձր մակարդակի առաջին միջազգային թիմային ինտերնետ-մրցաշարն է, որին մասնակցում են առաջատար թիմեր ու շախմատիստներ: Մեզ համար հաճելի է, որ այդպիսով կշարունակվի մեր հայրենակից, աշխարհի լեգենդար չեմպիոն Տիգրան Պետրոսյանի 75-ամյակի տարվա մրցումների շարքը:
Մրցաշարի անցկացումը՝ կապի արդիական տեխնոլոգիաների օգտագործմամբ, միլիոնների խաղի տրամաբանական առաջխաղացումն է դեպի նոր, բուռն զարգացում ապրող վիրտուալ աշխարհ: Ի դեպ, այս տարի լրանում է այնտեղ Հայաստանի մուտք գործելու 10-ամյակը:
Ողջունում եմ Ռուսաստանի, Չինաստանի, Ֆրանսիայի և Հայաստանի թիմերին, որոնք պայքարելու են մրցաշարում առաջնության համար, և մարզական ու ստեղծագործական հաջողություններ եմ մաղթում նրանց: Ողջունում եմ մրցաշարի նախաձեռնողներին ու հիմնական կազմակերպիչներին՝ Հայաստանի շախմատի ֆեդերացիային և Հայաստանի շախմատի ակադեմիային, վաղուց մտահղացված մրցաշարի անցկացման կապակցությամբ: Ցանկանում եմ նշել նաև նրանց ակտիվությունը ընդհանրապես այս տարվա ընթացքում Տիգրան Պետրոսյանի հիշատակին նվիրված մրցաշարերի կազմակերպման գործում:
Հաջող մեկնարկ և ընթացք եմ մաղթում մրցաշարին, հաջողություններ՝ նաև բոլոր մասնակիցներին:
