երկուշաբթի, 13 նոյեմբերի 2000
Այսօր ՀՀ վարչապետ Անդրանիկ Մարգարյանը ֆինանսների և էկոնոմիկայի նախարարության աշխատակիցներին ներկայացրեց նոր նշանակված նախարար Վարդան Խաչատրյանին: Տեղեկացնելով, որ նախկին նախարար Լևոն Բարխուդարյանն աշխատանքից ազատվել է իր դիմումի համաձայն, վարչապետն ավելացրեց, որ նրա հրաժարականն անսպասելի էր: Ըստ վարչապետի, նախարարի փոփոխություն է տեղի ունենում ծանր ժամանակաշրջանում, սակայն, նոր նշանակված նախարարը ֆինանսական ոլորտին անտեղյակ մարդ չէ, ծանոթ է ընդհանուր վիճակին, ունի անհրաժեշտ աշխատանքային փորձ և, գուցե, շատ ավելի ճիշտ է, որ ԱԺ-ում 2001 թ. պետական բյուջեի քննարկումներից առաջ կատարվեր այս նշանակումը, որպեսզի նոր նախարարն այդ ծանրության տակ մտնելով և ուղղակիորեն մասնակցելով աշխատանքներին, սկիզբից ևեթ պատասխանատվություն վերցներ բյուջեի համար:
Վարչապետը հավաստիացրեց, որ համակարգում հեղափոխություններ չեն լինի, նորանշանակ նախարարը՝ կառավարության որդեգրած քաղաքականության շրջանակներում, կշարունակի նախորդի աշխատանքը: Անդրանիկ Մարգայրանի բնորոշմամբ, դեռևս ոտքի չկանգնած տնտեսություն ու սոցիալական լարվածություն ունեցող երկրում միանգամայն հասկանալի է հասարակության դժգոհությունը ֆինանսների և էկոնոմիկայի նախարարությունից, սակայն նախարարությունը ծախսումներ է կատարում ըստ հավաքագրված եկամուտների, այսինքն՝ ծախսում է այն, ինչ ունենք: Եկամուտների հավաքագրմամբ զբաղվում է միանգամայն այլ նախարարություն:
Ըստ վարչապետի, կառուցվածքային փոփոխությունների ժամանակ չստեղծվեց էկոնոմիկայի առանձին նախարարություն, և այժմ մեկ ընդհանուր նախարարության մեջ ծանրությունը մեծապես ընկած է ֆինանսների ոլորտի վրա, որն ավելի շատ առօրեական հարցեր է լուծում: Էկոնոմիկայի նախարարության խնդիրը պիտի դառնար այդ առօրեական հարցերի լուծմանը նպաստող դաշտի ստեղծումը, տնտեսության համար առաջիկա և հեռագնա ծրագրերի մշակումը:
Վարչապետ Անդրանիկ Մարգարյանը, շնորհակալություն հայտնելով նախկին նախարար Լևոն Բարխուդարյանին՝ իր առջև դրված խնդիրները կատարելու համար, վստահեցրեց, որ նորանշանակ նախարարի հետագա արդյունավետ աշխատանքի համար նախադրյալներ ստեղծված են, և նախարարության աշխատակիցները՝ համագործակցված աշխատելով նոր նախարարի հետ, կկարողանան իրենց գերատեսչության աշխատանքից ակնկալվող արդյունքն ապահովել:
