երկուշաբթի, 26 դեկտեմբերի 2022
ՀՀ նախագահ Վահագն Խաչատուրյանն ընդունել է փոխվարչապետ Տիգրան Խաչատրյանին
Փոխվարչապետ Տիգրան Խաչատրյանն այսօր՝ դեկտեմբերի 26ին, հանդիպում է ունեցել Հանրապետության նախագահ Վահագն Խաչատուրյանի հետ:
Ողջունելով փոխվարչապետ Խաչատրյանին՝ նախագահը շնորհավորել է նրան բարձր եւ պատասխանատու պաշտոնում նշանակվելու կապակցությամբ:
«Ես որեւէ կասկած չունեմ, որ ֆինանսների եւ էկոնոմիկայի նախարարի Ձեր փորձը մեծ ու կարեւոր դեր է խաղալու փոխվարչապետի պաշտոնում: Վստահ եմ՝ Ձեր նշանակումը կնպաստի կառավարության աշխատանքի արդյունավետության բարձրացմանը»,- ընդգծել է նախագահը:
Փոխվարչապետը, շնորհակալություն հայտնելով ընդունելության համար, նշել է, որ իր աշխատանքային կենսագրության ընթացքում մշտապես առաջնորդվել է համագործակցության սկզբունքով եւ նոր պաշտոնում ջանքեր չի խնայելու իր համակարգման ներքո գտնվող գերատեսչությունների կառավարման արդյունավետության բարձրացման ուղղությամբ:
Հանդիպման ընթացքում Տիգրան Խաչատրյանը Հանրապետության նախագահին է ներկայացրել տարվա ավարտին հայաստանյան ֆինանսական համակարգերում առկա ընթացիկ զարգացումների ընդհանուր պատկերը եւ գալիք տարում կանխատեսելի ռիսկերն ու դրանց դիմակայելու ուղիները, մասնավորապես՝ կապիտալ ծախսերի կատարողականի բարձրացմանն ուղղված միջոցառումների հնարավորությունները:
