երկուշաբթի, 18 դեկտեմբերի 2000
Դեկտեմբերի 18-ին ՀՀ կառավարության ընդունելությունների տանը բացված «Տեղական ինքնակառավարման Եվրոպական խարտիայի սկզբունքների կենսագործումը Հայաստանի Հանրապետությունում» միջազգային կոնֆերանսում ՀՀ վարչապետ Անդրանիկ Մարգարյանը մասնակիցներին ուղղված ողջույնի խոսքում կարևորել է տեղական ինքնակառավարման մարմինների և կառավարության սերտ համագործակցությունը, ընդգծելով, որ գործադիր իշխանությունը տեղական ինքնակառավարումը դիտարկում է որպես Հայաստանում ժողովրդավարության և քաղաքացիական հասարակության կայացման առաջնային ինստիտուտ:
Իր խոսքում ՀՀ վարչապետը մասնավորապես նշել է. «Հայաստանը քաղաքացիական հասարակության կառուցման ճանապարհին ժողովրդավարական կարևորագույն ինստիտուտների կայացման խնդիր ունի, որոնց շարքում տեղական ինքնակառավարումն ամենանշանակալիցներից է: Կարող եմ ասել, որ նույնիսկ այս ինստիտուտի արդյունավետությամբ է պայմանավորված Հայաստանում ժողովրդավարության ապագան: Քաղաքացիները անցած տարիների քաղաքական բարեփոխումների արդյունքում ծառայությունների մատուցման էական բարելավում են ակնկալում:
Ըստ էության քաղաքացիները առօրյա կյանքում այդ ծառայությունների որակով են գնահատում իրականացված և իրականացվող քաղաքական բարեփոխումների արդյունավետությունը: Եվ սա պատահական չէ, քանզի մարդու հիմնական իրավունքները նյութական դրսևորում են ստանում և իրականացվում են առաջին հերթին հենց տեղական ինքնակառավարման մակարդակում:
Ես ուզում եմ հավատալ, որ այս ոլորտում պետական քաղաքականությունը նպատակաուղղված է տեղական ինքնակառավարման հետագա զարգացմանը, նրա գործունեության արդյունավետության բարձրացման ապահովմանը՝ որպես տնտեսապես և սոցիալապես զարգացած ժողովրդավարական պետության կայացման նախապայման: ՀՀ կառավարության քաղաքականությունը ելնում է ՀՀ սահմանադրության դրույթներից և ուղղված է՝
տեղական ինքնակառավարում իրականացնելու քաղաքացիների իրավունքի ապահովմանը,
տեղական ինքնակառավարման մարմինների կողմից իրենց իրավասությունները իրականացնելու համար պայմանների ապահովմանը և
տեղական ինքնակառավարման պետական երաշխիքների ապահովմանը:
Այս ուղղություններից յուրաքանչյուրի սահմաններում պետք է որոշակիացվի լուծվելիք խնդիրների շրջանակը:
Ի տարբերություն եվրոպական շատ երկրների, Հայաստանի առանձնահատկությունը նաև այն է, որ հասարակական-պետական ողջ համակարգի բարեփոխումների իրականացումը՝ այդ թվում նաև տեղական ինքնակառավարման ինստիտուտը կենտրոնական իշխանությունների կողմից նախաձեռնվեց և ներդրվեց ընդամենը մի քանի տարիների ընթացքում:
Եթե գնահատելու լինենք այն, ինչ ունենք՝ բավական ճանապարհ ենք անցել, բայց և շատ են անելիքները: Այս առումով կարևորագույնը հետագա ապակենտրոնացման քաղաքականության իրականացումն է, կառավարման մակարդակների միջև սուբսիդիարության սկզբունքի հիմքով լիազորությունների արդյունավետ բաշխումը: Այստեղից էլ անհրաժեշտությունը, որ կենտրոնական իշխանությունները դեռևս պետք է հանդես գան տեղական ժողովրդավարության բարեփոխումների պատասխանատվությամբ:
Հետագա ապակենտրոնացման իրականացմանը զուգընթաց կառավարությունը պետք է հնարավորինս աջակցի տեղական մարմինների մասնագիտական զարգացմանը, նոր ստացվող լիազորությունները մասնագիտորեն իրականացնելու պատրաստվածության բարձրացմանը:
Ինքնին կառավարության վերը նշված քաղաքականության հավաստումն է նաև Եվրոպայի խորհրդին անդամակցելու գործընթացում ՀՀ-ի կողմից ստանձնած պարտավորությունները:
Ողջունում եմ նման միջոցառման կազմակերպումը Երևանում, մաղթում արդյունավետ աշխատանք»:
