ուրբաթ, 22 դեկտեմբերի 2000
ՀՀ տարածքային կառավարման և քաղաքաշինության գործունեությունը համակարգող նախարար Հովիկ Աբրահամյանի մոտ այսօր տեղի ունեցավ խորհրդակցություն հանրապետության մարզպետների մասնակցությամբ:
Օրակարգում կառավարությանն ու մարզպետներին մտահոգող մի շարք հիմնախնդիրներ էին, որոնց տարվա ընթացքում պարբերաբար անդրադարձ եղել է: Դրանք վերաբերում են ոռոգման և խմելու ջրի վարձավճարների հավաքագրման ընթացքին, մարզային կտրվածքով համայնքների բյուջեների 1999 և 2000 թթ. դոտացիաների հատկացումներին և այսօր արդեն օրախնդիր դարձած ճանապարհների ձմեռային շահագործման ու պահպանման 2000-2001 թթ. ծրագրին:
Քանի որ օրակարգում ներառված հարցերը կառավարության համար մեծ կարևորություն ունեն, բացի այդ, սա նորանշանակ նախարար Հովիկ Աբրահամյանի առաջին հանդիպումն էր մարզպետների հետ, վարչապետն անձամբ մասնակցեց և բացեց խորհրդակցությունը: Նա նախ ներկայացրեց նոր նախարարին և Արարատի մարզպետին, ապա համառոտ անդրադարձավ օրակարգի հարցերին, նշելով, որ դրանց լուծման համար մարզպետների և տարածքային կառավարման ու քաղաքաշինության նախարարության աշխատանքն ավելի համակարգված պետք է դառնա՝ այնպես, որ երկու ոլորտներ՝ քաղաքաշինություն և տարածքային կառավարում ներառող նախարարության աշխատանքում չառանձնացվի դրանցից մեկը, արդյունքում անուշադրության մատնելով մյուսը:
