չորեքշաբթի, 12 ապրիլի 2023
Շարունակվել են փոխվարչապետ Մհեր Գրիգորյանի գլխավորած հայկական պատվիրակության վաշինգտոնյան հանդիպումները
Համաշխարհային բանկի (ՀԲ) խմբի և Արժույթի միջազգային հիմնադրամի (ԱՄՀ) Կառավարիչների խորհուրդների 2023թ. գարնանային հանդիպումների շրջանակներում փոխվարչապետ Մհեր Գրիգորյանի գլխավորած հայկական պատվիրակությունը ապրիլի 11-ին հանդիպումներ է ունեցել ԱՄՀ փոխկառավարիչ Բո Լիի, ինչպես նաև Միջազգային ֆինանսական կորպորացիայի (ՄՖԿ) բարձրաստիճան պաշտոնատար անձանց հետ:
ԱՄՀ փոխկառավարչի հետ հանդիպման ընթացքում ներկայացվել է ՀՀ մակրոտնտեսական իրավիճակը, քննարկվել են Պահուստային ծրագրի առաջին վերանայման արդյունքները, ինչպես նաև Հայաստանին տրամադրվող տեխնիկական աջակցության հնարավոր նոր ուղղությունները:
Միջազգային ֆինանսական կորպորացիայի գործընկերների հետ հանդիպման շրջանակներում անդրադարձ է կատարվել ընթացիկ համագործակցությանն առնչվող հարցերին: ՄՖԿ կողմից բարձր է գնահատվել ՄՖԿ ընդհանուր կապիտալի և ընտրողական կապիտալի համալրումներին սահմանված ժամկետներում Հայաստանի բաժանորդագրությունը:
