ուրբաթ, 15 ապրիլի 2005
Այսօր ՀՀ կառավարությունում տեղի է ունեցել Հայոց ցեղասպանության 90-ամյակին նվիրված միջոցառումների կազմակերպման պետական հանձնաժողովի նիստ, որը վարել է հանձնաժողովի նախագահ, վարչապետ Անդրանիկ Մարգարյանը:
Հանձնաժողովը քննարկել է 90-ամյակի միջոցառումների ծրագրի իրականացման ուղղությամբ կատարվող նախապատրաստական աշխատանքների ընթացքը: Հանձնաժողովի անդամ՝ միջոցառումներն իրականացնող մարմինների ղեկավարները զեկուցել են, մասնավորապես, ապրիլի 20-21-ին Հայոց ցեղասպանությանը և այդ առումով մարդու իրավունքների պաշտպանությանը նվիրված միջազգային գիտաժողովի, ապրիլի 23-ին Ալ. Սպենդիարյանի անվան օպերայի և բալետի ազգային ակադեմիական թատրոնում Հիշատակի համերգի, 90-ամյակի շրջանակներում ապրիլի 21-24-ը Հունգարիայի ազգային ռադիոյի երգչախմբի համերգային այցի, դեպի Մեծ եղեռնի զոհերի հուշահամալիր գիշերային երթի, ապրիլի 24-ին Մեծ եղեռնի զոհերի հուշահամալիր և Հայոց ցեղասպանության զոհերի հիշատակին կառուցված այլ հուշարձաններ այցելությունների, ինչպես նաև 90-ամյակին նվիրված գիտաժողովների, թանգարանային ցուցադրությունների և ցուցահանդեսների կազմակերպման, գրքերի, արխիվային նյութերի հրատարակման, լազերային սկավառակների թողարկման և այլ միջոցառումների նախապատրաստական աշխատանքների վերաբերյալ:
Նիստում կարևորվել է, մասնավորապես, բոլոր միջոցառումների պատշաճ մակարդակով լուսաբանման, Հայոց ցեղասպանության 90-ամյակին նվիրված քարոզչության կազմակերպման խնդիրը, որի ուղղությամբ կատարվող աշխատանքները ներկայացրել է դրանք համակարգող աշխատանքային խմբի ղեկավար Արամ Սիմոնյանը:
Հանձնաժողովն անդրադարձել է նաև ծրագրով նախատեսված և ամբողջ տարվա ընթացքում իրականացվելիք միջոցառումներին:
