ուրբաթ, 15 ապրիլի 2005
Այսօր տեղի է ունեցել ՀՀ կառավարության բարեգործական ծրագրերի համակարգման հանձնաժողովի հերթական նիստը, որը վարել է հանձնաժողովի նախագահ Ս. Տեր-Սիմոնյանը:
Հանձնաժողովը քննարկել է 9 բարեգործական ծրագիր: Մասնավորապես, քննարկվել և հաստատվել են «Հայաստան» համահայկական հիմնադրամի կողմից իրականացվող Գյումրու թիվ 10 միջնակարգ դպրոցի մարզադահլիճի կառուցման, Շիրակի մարզի Մարալիկ քաղաքի թիվ 1 դպրոցի բարեկարգման, Ստեփանակերտի քաղաքային պոլիկլինիկայի դռների պատրաստման աշխատանքների, «Վորլդ Վիժն Ինթերնեյշնլ» միջազգային բարեգործական կազմակերպության հայաստանյան մասնաճյուղի կողմից իրականացվող «Բարեգործական բեռների ներմուծում և անհատույց բաշխում Սիսիանի ու Կապանի տարածաշրջաններում» և Գեղարքունիքի մարզում», «Բարեշավիղ միաբանություն» բարեգործական հասարակական կազմակերպության կողմից իրականացվող «Օգնություն մանկատներին և կարիքավորներին» ծրագրերը:
«Կամար» բարեսիրական հասարակական կազմակեպության կողմից իրականացվող «Վանաձորի թիվ 1 հատուկ դպրոցի ննջարանային մասնաշենքի վերանորոգում և կահավորում» ծրագրով նախատեսվում է ստեղծել համապատասխան պայմաններ դպրոցում սովորող — գիշերող երեխաների համար, նպաստել և աջակցել դպրոցի լիարժեք գործունեությանը:
«Առդա» բարեգործական հիմնադրամի կողմից իրականացվող «Բարեկեցիկ մանկություն - 5» ծրագրով սնունդ և հագուստ կտրամադրվի Վանաձորի թիվ 5 մանկապարտեզի սաներին, կբարելավվեն նրանց կենցաղային պայմանները:
Նիստում քննարկվել և հաստատվել են նաև նախկինում հաստատված ծրագրերի շրջանակներում իրականացվող հարակից գործարքներ և տարբեր կազմակերպությունների հասցեներով ուղարկված բարեգործական բեռների ներմուծման 8 ծրագրեր:
