ուրբաթ, 29 ապրիլի 2005
Այսօր տեղի է ունեցել ՀՀ ջրի ազգային խորհրդի նիստ, որը վարել է խորհրդի նախագահ, ՀՀ վարչապետ Անդրանիկ Մարգարյանը:
Լսվել են ջրային ոլորտի օրենսդրական բարեփոխումների ընթացքի վերլուծությանը, դրանից բխող հետագա քայլերի և մի շարք այլ հարցերի վերաբերյալ խորհրդի նախորդ նիստում տրված հանձնարարականների կատարման ընթացքի մասին ՀՀ բնապահպանության նախարարության, կառավարությանն առընթեր ջրային տնտեսության պետական կոմիտեի և հանրային ծառայությունները կարգավորող հանձնաժողովի նախագահների հաշվետվությունները: Քննարկում է ծավալվել նաև ՀՀ ջրի ազգային ծրագրի նախագծի մշակման ընթացքի մասին:
Խորհուրդն ի գիտությունն է ընդունել Ջրային համակարգերի օգտագործման և պահպանության տեխնիկական հանձնաժողովի 2002-2004թթ. կատարած աշխատանքների մասին հանձնաժողովի նախագահ, ջրի ազգային խորհրդի քարտուղար Հովհաննես Թոքմաջյանի տեղեկատվությունը: Նա զեկուցել է, որ հիշյալ ժամանակահատվածում հանձնաժողովը գումարել է 28 նիստ, որտեղ քննարկվել և եզրակացություններ են ներկայացվել մի շարք ջրամբարներում ջրի որակի դիտարկումներ իրականացնելու անհրաժեշտության, պատվարների վերականգնման խնդիրների, որոշ պոմպակայաններում ստեղծված իրավիճակի և դրա դեմ պայքարի տեխնիկական լուծումների, անհրաժեշտ նորմատիվային փաստաթղթերի մշակման ու բազմաթիվ այլ հարցերի վերաբերյալ, որոնք տեղեկանքի տեսքով ներկայացվել են խորհրդի անդամներին: Համապատասխան պետական մարմիններին հանձնարարականներ են տրվել՝ օժանդակելու տեխնիկական հանձնաժողովի աշխատանքներին, այն արդյունավետ ու համակարգված կազմակերպելու համար:
Նիստում, Հանրային ծառայությունները կարգավորող հանձնաժողովի նախագահ Ռոբերտ Նազարյանը ներկայացրել է հանձնաժողովի և շահագրգիռ մարմինների մոտեցումները ջրի գնագոյացման (այդ թվում՝ ռեսուրսավճարի) մեթոդաբանական հարցերի և սակագնային քաղաքականության մասին:
Օրակարգում ներառված մեկ այլ հարցի՝ համատիրությունների կայացման գործընթացի և գործունեության արդյունքների վերաբերյալ որոշվել է հրավիրել առանձին խորհրդակցություն, որտեղ համատիրությունների զարգացման հարցը կքննարկվի ոչ միայն որպես կայուն ջրամատակարարման իրականացման գործընթացի բաղկացուցիչ մաս, այլ համակարգված՝ նաև համատիրություններին ուղղակիորեն առնչվող մյուս բոլոր բնագավառների մասով:
