ուրբաթ, 29 ապրիլի 2005
Այսօր տեղի է ունեցել ՀՀ կառավարության բարեգործական ծրագրերի համակարգման հանձնաժողովի հերթական նիստը, որը վարել է հանձնաժողովի նախագահ Ս. Տեր-Սիմոնյանը:
Հանձնաժողովը քննարկել է 10 բարեգործական ծրագիր: Մասնավորապես, քննարկվել և հաստատվել են «Հայաստան» համահայկական հիմնադրամի կողմից իրականացվող Լեռնային Ղարաբաղի Հանրապետության «Հյուսիս-Հարավ» Դրմբոն-Մարտակերտ 12-24 կմ հատվածի 11,6 կմ երկարությամբ 4-րդ կարգի ճանապարհի կառուցման աշխատանքների և Երևանի Նորքի ինֆեկցիոն հիվանդանոցի վերակենդանացման բաժանմունքի վերանորոգման աշխատանքների իրականացման ծրագրերը, «Վիեննայում ստեղծված «Ավստրիական մանկական հիվանդանոցին օժանդակող միության» ֆինանսավորմամբ Գյումրու ավստրիական մանկական հիվանդանոցի հիվանդ երեխաների համար իրականացվող բարեգործական ծրագիրը, որով նախատեսվում է անհրաժեշտ դեղորայքի գնում և անհատույց տրամադրում հիվանդ երեխաներին, ինչպես նաև նյութատեխնիկական բազայի թարմացում, շենքի ու շրջակա միջավայրի վերանորոգման աշխատանքների կատարում:
Թուֆենկյան բարեգործական հիմնադրամի կողմից իրականացվող «Անկողնային պարագաների պատրաստում — բաշխում» ծրագիրը, որի նպատակն է ապահովել մանկատներին, հատուկ դպրոցներին, հասարակական կազմակերպությունների խնամքի տակ գտնվող անձանց անկողնային պարագաներով, «Վորլդ Վիժն Ինթերնեյշնլ» միջազգային բարեգործական կազմակերպության հայաստանյան մասնաճյուղի կողմից իրականացվող «Բարեգործական բեռների ներմուծում և անհատույց բաշխում Լոռու, Տավուշի ու Շիրակի մարզերում», ինչպես նաև «Գյումրիի տարածքային զարգացման ծրագրի տարածքում գտնվող բակերի բարեկարգման և խաղահրապարակների կառուցման» ծրագրերը ևս հաստատվել են հանձնաժողովի կողմից:
Բարեգործական ծրագրերի համակարգման հանձնաժողովը քննարկել և հաստատել է նաև նախկինում հաստատված ծրագրերի շրջանակներում իրականացվող հարակից գործարքներ և տարբեր կազմակերպությունների հասցեներով ուղարկված բարեգործական բեռների ներմուծման 12 ծրագրեր:
